Yuxarı
    Bağlamaq

    "Ümid" yatağından indiyədək hasil olunan qazın həcmi açıqlanıb

    Xoşbəxt Yusifzadə: Yeni quyuya böyük ümidlər bəsləyirik

    Bakı. 29 avqust. REPORT.AZ/ Azərbaycanda işlənmənin əvvəlindən "Ümid" yatağından ümumilikdə 1 mlrd. kubmetrdən çox qaz və 160 min tondan artıq kondensat hasil edilib. "Report" xəbər verir ki, bu barədə Azərbaycan Dövlət Neft Şirkətinin (SOCAR) I vitse-prezidenti Xoşbəxt Yusifzadə Bakıda keçirilən I Avrasiya konfransında məlumat verib. 

    SOCAR rəsmisi qeyd edib ki, hazırda yataqda 10 və 12 nömrəli quyular işləyir. Onun sözlərinə görə, hazırda yataqda dərinliyi 6 500 metr olan yeni 14 nömrəli istismar quyusu qazılır. 

    "Quyunun dərinliyi artıq 6 200 metrə çatdırılıb. Bu quyuya böyük ümidlər bəsləyirik. Çünki "Ümid" yatağının işlənilməsi çərçivəsində burada yeni 4 özülün quraşdırılması və bu özüllərdən 19 istismar quyusunun qazılması layihəsi üzərində iş aparılır. Yeni quyudan əldə olunan məlumatların, eləcə də qazmanın nəticəsinin bu məsələdə bizim üçün xüsusi əhəmiyyəti olacaq", - deyə X.Yusifzadə əlavə edib. 

    Qeyd edək ki, "Ümid" qaz kondensat yatağını SOCAR 2010-cu ildə kəşf edib. Bu yataq müstəqillik illərində SOCAR-ın kəşf etdiyi ilk yataqdır. İlkin məlumatlara görə, "Ümid" yatağının karbohidrogen ehtiyatları 200 mlrd. kubmetr qaz və 40 mln. ton kondensat həcmindədir.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi