Yuxarı

SOCAR: TAP-ın inşası üçün artıq ciddi əngəl qalmayıb

TAP layihəsi planlaşdırılmış tikinti qrafikinə uyğun həyata keçirilir

Bakı. 8 yanvar. REPORT.AZ/ Trans-Adriatik Boru Kəməri (TAP) layihəsinin inşasının reallaşması üçün artıq ciddi əngəl qalmayıb. Bu barədə "Report"un sorğusuna cavab olaraq SOCAR-dan bildirilib: "Məlumdur ki, hər bir layihənin gerçəkləşməsi müəyyən maneələrlə üzləşir. Cənub Qaz Dəhlizi və onun bir hissəsi olan TAP layihəsi də ilk günlərdən böyük və kiçik maneələrlə üzləşib. Xəzər dənizindən Adriatik dənizinə kimi müxtəlif ölkələr, mədəniyyət və hüquq sistemlərini, hətta müxtəlif qitələri birləşdirmək, razı salmaq, vahid format və layihə çərçivəsinə cəlb etmək özü nəhəng bir vəzifə idi. Onlarla şirkət və bir-birindən fərqli maraqları olan bir sıra dövlətin iştirakını təmin etmək əsas məsələlərdən biri idi".

Qeyd olunub ki, Azərbaycan müvəffəqiyyətlə bu vəzifənin öhdəsindən gələ bilib, hazırda bütün əsas məsələlər həllini tapıb: "Cənub Qaz Dəhlizi Avropa İttifaqı və Avropa ölkələri üçün prioritet layihələrdən biridir. Əlbəttə, TAP layihəsinin reallaşmasında bəzən kiçik texniki maneələr yaranır və adətən, qısa müddətdə həll olunur. Sözügedən kiçik əngəllər əsasən bölgə və bələdiyyə səviyyəsində yaranır".

Bildirilib ki, müvafiq danışıqlar keçiriləndən sonra anlaşılmazlıqlar aradan qaldırılır və bütün tərəfləri qane edən və yerli qanunvericiliyə əsaslanan çözüm variantı qəbul olunur. "Məsələn, İtaliyada zeytun ağaclarının qorunması üçün addımlar atılır. Yunanıstana gəldikdə isə bir sıra icazə və lisenziyaların alınması prosesi artıq Yunanıstan Energetika Nazirliyi tərəfindən həyata keçirilir. TAP layihəsinin bu ölkələrin müvafiq qurum və idarələri ilə təşkil etdiyi sıx əməkdaşlıq və əlaqələndirilmə bu kimi problemlərin səmərəli şəkildə həll olunmasını təmin edir. Ümumilikdə, TAP layihəsi planlaşdırılmış tikinti qrafikinə uyğun həyata keçirilir, gecikmə yoxdur və ciddi əngəllər gözlənilmir", - deyə SOCAR-dan bildirilib.

Qeyd edək ki, Cənub Qaz Dəhlizi layihəsinin bir hissəsi olan TAP kəməri ilə "Şahdəniz-2" layihəsi çərçivəsində hasil olunan qazın ilkin mərhələdə ildə 10 mlrd. kubmetri Avropaya nəql olunacaq. Bu boru kəməri Türkiyə-Yunanıstan sərhədindəki Kipoy ərazisindən başlanacaq və Yunanıstan, Albaniya və Adriatik dənizindən keçməklə Cənubi İtaliyaya qədər uzanacaq. Boru kəmərinin uzunluğu 878 km təşkil edir ki, bunun da 545 km-i Yunanıstan ərazisini, 215 km-i Albaniyanı, 105 km-i Adriatik dənizini, 8 km-i isə Cənubi İtaliyanı əhatə edəcək. Boru kəmərinin ən yüksək nöqtəsi Albaniya dağlarında (1 800 metr), ən aşağı hissəsi isə (820 metr) dənizin altında olacaq. Hazırda TAP kəmərinin tikintisinə hazırlıq işləri aparılır. Bu il boru kəmərinin tikintisinə başlanması nəzərdə tutulur.

Xatırladaq ki, TAP-ın səhmdarları rolunda BP (20%), SOCAR (20%), "Snam S.p.A." (20%), "Fluxys" (19%), "Enagas" (16%) və "Axpo" (5%) şirkətləri çıxış edir.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi