​SOCAR prezidenti Sumqayıt Etilen-Polietilen Zavoduna baş çəkib

Bakı. 8 may. REPORT.AZ Bu gün Azərbaycan Dövlət Neft Şirkətinin (SOCAR) prezidenti Rövnəq Abdullayev və şirkət rəhbərliyinin nümayəndələri Sumqayıt şəhərində olublar. "Report" xəbər verir ki, səfər çərçivəsində SOCAR prezidenti və onu müşayiət edən şəxslər əvvəlcə Təlim, Tədris və Sertifikatlaşdırma İdarəsinin Sumqayıt Təlim-Tədris Mərkəzində istehsalatdan ayrılmaqla, bir aylıq təkmilləşmə kursu keçən Etilen-Polietilen Zavodunun mühəndis və fəhlə kardları ilə görüşüb. Bildirilib ki, Sumqayıtda peşə ixtisasları üzrə müasir standartlara cavab verəcək şəkildə yaradılmış geniş və ixtisaslaşdırılmış auditoriyalara malik peşə təhsili üzrə tədris vasitələri və mütərəqqi texniki avadanlıqlarla təchiz edilmiş Təlim-Tədris Mərkəzində müxtəlif peşə üzrə yüksək dərəcəli fəhlə kadrları hazırlanmaqla bərabər, "Azərkimya" İB-nin müəssisələrində çalışan işçilər üçün ixtisasartırma, ixtisasdəyişmə və təkmilləşdirmə kursları da təşkil olunur. Hazırda 14-ü ali təhsilli mühəndis, 7-si fəhlə kadrı olmaqla 21 nəfər ixtisasartırma kurslarında iştirak edir. İlin sonuna qədər ümumilikdə 75 nəfərin bu kurslardan keçməsi nəzərdə tutulub.

SOCAR prezidenti R.Abdullayev və onu müşayiət edən şəxslər "Azərkimya" İB-nin Etilen-Polietilen Zavodunun istehsalata və keyfiyyətə nəzarət, eləcə də sənaye-sanitar sahələrini özündə birləşdirən yeni laboratoriyasının əsaslı təmir və yenidənqurma işlərindən sonra istismara verilməsi ilə əlaqədar keçirilmiş tədbirdə də iştirak ediblər. SOCAR prezidentinə məlumat verilib ki, laboratoriyalar Rusiya və Almaniya istehsalı olan müasir tipli cihaz və xromatoqraflarla təchiz edilib. Bu isə müasir standartlara uyğun analizlər aparmaqla ətraf mühitin insan orqanizminə təsirini, ekoloji vəziyyətini, zərərli və təhlükəli istehsalat amillərini, istifadə edilən suyun çirklilik dərəcəsini, atmosferə atılan tullantıların miqdarını və başqa parametrləri daha dəqiq müəyyənləşdirməyə imkan verəcək. Laboratoriyada çalışanların iş şəraiti də yaxşılaşdırılıb.

Daha sonra R. Abdullayev qaz məhsullarının kükürd birləşmələrindən təmizlənməsi və qaz fraksiyalarının hidrogenləşməsi qurğularında tikinti işlərinin gedişi ilə tanış olub. SOCAR prezidentinə, həmçinin buxar və elektrik enerjisi istehsalatında aparılacaq modernləşdirmə işləri haqqında da məlumat verilib.