Bakı. 28 sentyabr. REPORT.AZ/ Azərbaycan Dövlət Neft Şirkətinin (SOCAR) Elm Fondu fundamental və innovasiya yönümlü elmi tədqiqat layihələrini və digər elmi tədbirləri, Azərbaycan Milli Elmlər Akademiyasında (AMEA) fəaliyyət göstərən alimlərin və yaradıcı kollektivlərin fəaliyyətini dəstəkləmək və onlara əlavə yaradıcılıq imkanları yaratmaq, elmi araşdırmaları stimullaşdırmaq məqsədilə müsabiqə elan edib.
“Report” SOCAR-a istinadən xəbər verir ki, müsabiqəyə yer, texnika və kimya elmlərini əhatə edən layihələr təqdim oluna bilər.
Neft-qaz yataqlarının neftveriminin artırılması, quyularda parafin, qətran, asfalten və qum çökmə problemləri, neft sənayesində qazma, hasilat, nəql, emal və s. proseslərdə innovativ texnika və texnologiyaların (o cümlədən nanotexnologiyaların) tətbiqi, quruda və dənizdəki neft-qaz obyektlərinin monitorinqində müasir robot texnikasından istifadə, neft-qaz hasilatının identifikasiyası məqsədilə elmi cihaz və avadanlıqlar yaradılması, neft-qaz kompleksində informasiya kommunikasiya texnologiyalarının tətbiqi problemləri, hasilatın optimallaşdırılmasında kompüter proqram təminatının və informasiya texnologiyalarının tətbiqi, neft-kimya proseslərinin riyazi modelləşdirilməsi, kiçik dərinliklər geofizikasının geoloji və arxeoloji aspektləri, həmçinin neft-qaz kompleksinin ekoloji problemləri və ətraf mühit mövzularında elmi layihələrə üstünlük veriləcək.
Müsabiqə fundamental və tətbiqi xarakterli elmi tədqiqat layihələrini, xüsusi layihələri və gənc alimlər üçün nəzərdə tutulan “həvəsləndirici mükafat”la qiymətləndirilən yaxın bir ildə tamamlanmış elmi tədqiqat layihələrini əhatə edən nominasiyalar üzrə keçirilir. Fundamental və tətbiqi xarakterli kiçik həcmli layihələr üçün 50 min manata qədər, orta həcmli layihələr üçün 50 mindən 100 min manata qədər, böyük həcmli layihələr üçün isə 100 mindən 200 min manata qədər maliyyə vəsaitlərinin ayrılması nəzərdə tutulur. Xüsusi layihələr kiçik həcmli layihələr üçün nəzərdə tutulmuş vəsait həcmində maliyyələşdirilir. Bu layihələrin predmetini Azərbaycanda elmi tədbirlərin təşkili və keçirilməsi, xarici elmi tədbirlərdə iştirak etmə, xarici ölkələrin birində doktorantura xətti üzrə təhsil alma və ya stajkeçmə təşkil edir. “Həvəsləndirici mükafat” nominasiyası üzrə birinci yer üçün 10 min manat, ikinci yer üçün hər biri 5 min manat məbləğində olan iki mükafat, üçüncü yer üçün isə hər biri 3 min manat məbləğində olan üç mükafat veriləcək.
Müsabiqədə AMEA-nın əməkdaşları və ya onlarla birgə layihədə çalışan SOCAR təmsilçiləri iştirak edə bilərlər. Müsabiqədə iştirak etmək istəyən layihə rəhbərləri imzaladıqları ərizəni və əlavə olunan digər sənədləri AMEA Rəyasət Heyəti aparatının Elm və Təhsil İdarəsinə (Ünvan: Bakı şəhəri, Səbail rayonu, İstiqlaliyyət küçəsi, 30, otaq 508) şəxsən təqdim etməlidirlər. Layihələr 1 noyabr 2017-ci il tarixinə qədər həftə içi hər gün (şənbə və bazar günləri istisna olmaqla) saat 10:00-dan 17:00-a qədər qəbul edilir. Müsabiqə ilə əlaqədar əlavə məlumat almaq üçün AMEA-nın Elm və Təhsil İdarəsinə (tel.: (012) 492-84-48; e-POÇT:
Bütün layihələr bir qayda olaraq, Azərbaycan dilində, sənədlərin 2 №-li forması isə əlavə olaraq ingilis və rus dillərində (xarici ekspertlərdən rəy alınması məqsədilə) tərtib edilməli, eyni məzmunda olan A4 formatlı kağız və elektron daşıyıcı (CD, DVD və s.) üzərində 2 nüsxədə təqdim olunmalıdır. Ərizəyə layihənin məzmununu, elmi istiqamətini, annotasiyasını və s. təsbit edən ümumi məlumatlar, xərclər smetası, layihə rəhbəri, icraçılar və onların çalışdığı qurum barədə məlumat, eləcə də layihə rəhbərinin və hər bir icraçının şəxsiyyət vəsiqəsinin, VÖEN-nin (əgər varsa) surəti, iş yerindən arayış kimi sənədlər ərizəyə əlavə edilir. Ərizə və məlumat formalarının nümunələrini AMEA-nın www.science.az və SOCAR-ın www.socar.az (