​SOCAR fevralda neft məhsullarının ixracını artırıb

Bakı. 2 mart. REPORT.AZ/ Bu ilin fevral ayı ərzində Azərbaycan Dövlət Neft Şirkəti (SOCAR) tərəfindən 129 895,462 ton neft məhsulu ixrac edilib.

SOCAR-dan "Report"a bildirilib ki, ixracl edilən məhsulun 54 070,386 tonu, yaxud 41,63%-i dizel yanacağı, 16 478,974 tonu və ya 12,67%-i təyyarə yanacağı, 45 500,614 tonu, yaxud 35,03%-i vakuum qazoylu və 13 845,488 tonu və ya 10,66%-i aşqarın (depressor AKİ) payına düşür.

Ötən ilin fevral ayı ilə müqayisədə SOCAR tərəfindən ixrac edilən neft məhsullarının ümumi həcmi 3,13%, təyyarə yanacağı 25,91%, vaakum qazoylu 32,09% artıb, dizel yanacağının ixracı isə 37,25% azalıb.

Məlumata görə, fevral ayında avtomobil benzini, DT yanacağı, soba mazutu, sürtgü yağları, neft bitumu və ağır piroliz ixrac edilməyib.

Qeyd edək ki, SOCAR 2015-ci ilin ilk iki ayında 339 651,768 ton, yaxud ötən ilin eyni dövrü ilə müqayisədə 52,75% çox neft məhsulu ixrac edib.

Ötən ilin eyni dövrü ilə müqayisədə yanvar-fevral ayları ərzində SOCAR 0,58% çox, yəni 165 227,571 ton dizel yanacağı, 39,68% çox, yəni 32 470,643 ton təyyarə yanacağı, 2,6 dəfə çox, yəni 123 620,850 ton vakuum qazoylu ixrac edib. Ötən ilin yanvar-fevral aylarında soba mazutu və aşqar (depressor AKİ) ixracı qeydə alınmasa da, bu ilin ilk iki ayı ərzində 178,836 ton soba mazutu və 18 153,868 ton aşqar ixrac olunub.