Yuxarı

​Rusiya və Azərbaycanın energetika nazirləri Doha sammiti ilə bağlı müzakirələr aparıblar

Aleksandr Novak: Neftin qiymətinin bir neçə dəfə aşağı düşməsi Rusiyanın da maraqlarına uyğun deyil

Bakı. 13 aprel. REPORT.AZ/ Rusiyanın energetika naziri Aleksandr Novak aprelin 17-ə Dohada (Qətər) keçiriləcək Neft İxrac edən Ölkələr Təşkilatına (OPEC) üzv və qeyri-üzv ölkələrin toplantısından əvvəl görüşmək məqsədilə Azərbaycanın energetika naziri Natiq Əliyevə zəng edib. Bu barədə “Report”a nazirliyin mətbuat xidmətindən məlumat verilib.

A.Novak dünya bazarında neftin qiymətinə dəstək məqsədilə hasilatın yanvar ayındakı səviyyədə saxlanılmasına dair səslənən təklifi və toplantı zamanı qəbul ediləcək qərarla bağlı Azərbaycan və Rusiyanın mövqeyinin öyrənilməsi məqsədilə məsləhətləşmələrin vacibliyini qeyd edərək, belə bir görüşün keçirilməsini xahiş edib.

Qeyd edək ki, neftin qiymətinin bir neçə dəfə aşağı düşməsi Azərbaycan kimi, milli iqtisadiyyatında neftin həlledici rol oynadığı Rusiyanın da maraqlarına uyğun deyil. Odur ki, neft hasilatçıları Doha görüşündən vəziyyətin müsbətə doğru dəyişməsinə təkan verəcək qərar gözləyirlər.

Azərbaycanı neft hasilatçılarının görüşündə energetika naziri Natiq Əliyev təmsil edəcək. Son məlumatlara görə, OPEC-in iclasına ümumilikdə 18 ölkə qatılacaq. Qazaxıstan daxil olmaqla, 6 ölkə dəvəti təsdiqləməyib. Norveç və Liviya isə toplantıya qatılmaqdan imtina edib. 

Xatırladaq ki, növbəti iclas 16 fevral 2016-cı il tarixində Doha şəhərində Qətər, Səudiyyə Ərəbistanı, Rusiya və Venesuela arasında baş tutmuş görüşün davamı olaraq keçirilir. Həmin görüş zamanı ölkələr neft hasilatının bu ilin yanvar ayındakı səviyyədə dondurulması ilə bağlı təklif irəli sürüb və digər neft ölkələrini də bu təklifə qoşulmağa çağırıblar.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi