Rusiya oktyabrda gündəlik neft hasilatını yeni rekord həddə çatdırıb

Bakı. 2 noyabr. REPORT.AZ/ Rusiyanın orta gündəlik neft hasilatı oktyabr ayında illik müqayisədə 3,9%, aylıq müqayisədə isə 1% artaraq 11,204 mln. barelə çatıb. "Report", "RİA Novosti" agentliyinə istinadən xəbər verir ki, bu məlumat Yanacaq-Energetika Kompleksi Mərkəzi Dispetçer İdarəsi tərəfindən verilib.

Qeyd edək ki, bununla da Rusiyada neft hasilatı sentyabrdakı 11,11 mln. barel/gün olan rekordunu təzələyib. "Bloomberg" agentliyinin məlumatına görə, Rusiyada neft hasilatı sentyabrda son 25 ildə ilk dəfə olaraq 11 mln. barel/gün həddini ötüb.

Xatırladaq ki, Rusiyanın oktyabr ayında neft ixracı illik müqayisədə 1,8% artım, aylıq müqayisədə isə 0,8% azalma göstərərək 5,551 mln. barel/gün təşkil edib.

Dünən "Reuters" agentliyi OPEC ölkələri üzrə oktyabrda neft hasilatının (33,82 mln. barel) rekord həddə çatması barədə xəbər yayıb. "Report"un analitik qrupu hesab edir ki, noyabrın 30-da Vyanada keçiriləcək OPEC-in sammitində neft hasilatının dondurulmasına dair qərar qəbul olunarsa, bu, hazırkı hasilat səviyyəsi ilə neft bazarında təklifin tələbi kifayət qədər üstələməsinə gətirib çıxaracaq və neft qiymətlərinin kəskin azalmasına səbəb olacaq.