Yuxarı
    Bağlamaq

    Rövnəq Abdullayev: "SOCAR hələ uzun illər Azərbaycan və Türkiyə iqtisadiyyatlarına xidmət etməsi üçün məqsədyönlü tədbirlər görməyə davam edəcək"

    Dinlə
    Şirkət prezidenti: “TANAP Azərbaycan və Türkiyənin dünyaya böyük töhfəsi olacaq”
    © Report

    İstanbul. 11 iyun. REPORT.AZ/ “Trans-Anadolu Qaz Boru Kəməri (TANAP) layihəsi Azərbaycan və Türkiyənin dünyaya böyük töhfəsi olacaq”.

    “Report”un Türkiyə müxbiri xəbər verir ki, bunu Azərbaycan Dövlət Neft Şirkətinin (SOCAR) prezidenti Rövnəq Abdullayev “SOCAR Turkey Enerji A.Ş”nın yeni inzibati binasının açılışında bildirib.

    R.Abdullayev qeyd edib ki, 2018-ci il Azərbaycan üçün ən önəmli tarixlərdəndir: “Belə ki, 100 il öncə Şərqdə ilk demokratik cümhuriyyət olaraq Azərbaycan Xalq Cümhuriyyəti yaranıb. Azərbaycan Prezidenti İlham Əliyev tərəfindən bu il “Azərbaycan Xalq Cümhuriyyəti ili” elan edilib. Bu bizim üçün böyük bir qürur mənbəyidir. Eyni zamanda bu il inşaatları davam edən layihələrimiz tamamlanaraq əməliyyata keçəcək. Azərbaycanın ulu öndəri, mərhum Heydər Əliyevin “bir millət, iki dövlət” şüarına uyğun olaraq, Türkiyədə bütün gücümüzlə çalışırıq. 2008-ci ildən bəri Türkiyədə investisiyalarımıza davam edərək Türkiyənin ən böyük xarici investoru ünvanını qazanmışıq”.

    SOCAR prezidenti bildirib ki, şirkətin həyata keçirməkdə olduğu layihələr tamamlandıqda Türkiyəyə yatırılan sərmayələrin həcmi, ümumilikdə, 19,5 mlrd.dollara çatacaq: “Biz Türkiyədəki fəaliyyətimizi regional əhəmiyyətli layihələrlə başladıq. Daha sonra qlobal enerji təhlükəsizliyi üçün mühüm önəm kəsb edən layihələrə imzamızı atdıq. Avropa İttifaqı ölkələrinin Azərbaycanın təbii qazı ilə təchizatında tarixi bir rol oynayacaq TANAP layihəsinin bildiyiniz kimi, sabah Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın iştirakı ilə Eskişəhərdə açılışı olacaq. Bu layihə Azərbaycan və Türkiyənin dünyaya böyük töhfəsi olacaq. 21-ci əsrin layihəsi olaraq səciyyələndirilən bu nəhəng layihə Azərbaycan və Türkiyə dövlətlərinin birgə səylərinin nəticəsidir”.

    O qeyd edib ki, bu ilin son rübündə isə Əliağada (İzmir) STAR Neft Emalı Zavodu, “Petlim” Konteyner Limanı, “Petkim” Külək Elektrik Stansiyasının açılışları baş tutacaq: "Bütün qeyd etdiyim bu layihələr ölkələrimizin gələcəyi, yeni iş yerlərinin açılması və inkişaf üçün ən vacib amillərdəndir. Bu binada Türkiyədə qeyd etdiyim investisiyalarımızı və gələcək planlarımızı tək mərkəzdən idarə etmək imkanı qazanacağıq. Belə ki, İstanbulda 4 fərqli binada olan işçilərimiz artıq tək binada toplanır və bu da öz növbəsində daha sürətli və effektiv qərarvermə və daha rahat kommunikasiya imkanı yaradacaq. Burada əməkdaşlarımız üçün bütün lazımi şəraitin yaradıldığı haqqında məlumat verildi. İş otaqları, iclas zalları, texnoloji və sosial imkanlar yaradılıb. İnanıram ki, bu rahat şəraitdə şirkətimiz və ölkələrimiz üçün daha böyük və uğurlu addımlar atacaq, Azərbaycan və Türkiyə üçün daim çalışacaqsınız. Ölkələrimizə və onların ortaq gələcəyinə inamımız sarsılmazdır. Tarix üçün qısa bir zaman kəsiyində qardaş Türkiyədə gördüyümüz bu işlər parlaq gələcəyə böyük inamımızın bariz ifadəsidir”.

    R.Abdullayev qeyd edib ki, Türkiyədəki bütün layihələr şirkət üçün xüsusi önəm daşıyır: “SOCAR-ın hələ uzun illər boyunca Azərbaycan və Türkiyə iqtisadiyyatlarına xidmət etməsini arzulayırıq və bu istiqamətdə məqsədyönlü tədbirlər görməyə davam edəcəyik. Bu gözəl binanın ərsəyə gəlməsində əməyi keçən, zəhməti olan hərkəsə təşəkkür edir, açılış münasibətilə təbrik edirəm. İnanıram ki, bu bina Azərbaycan investisiyalarının mərkəzi olmaqla yanaşı, iki qardaş ölkə arasında daim artan iqtisadi və mədəni işbirliyinin də mərkəzi olacaq”.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Bu xəbər həm də başqa dillərdə mövcuddur:

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi