Qari Counz: “ACE layihəsindən ilk neftin əldə edilməsinə doğru mühüm addım atılıb”

“Azəri Mərkəzi Şərqi” (ACE) platformasının dayaq blokunun Xəzər dənizində “Azəri-Çıraq-Günəşli” (AÇG) müqavilə sahəsindəki daimi yerinə yola salınması ACE layihəsindən ilk neftin əldə edilməsinə doğru atılmış mühüm bir addımdır.

“Report”un AÇG yatağının işlənməsi layihəsinin operatoru “BP-Azerbaijan” şirkətinə istinadən verdiyi məlumata görə, bunu şirkətin Azərbaycan, Gürcüstan və Türkiyə üzrə regional prezidenti Qari Counz bu gün “Heydər Əliyev” adına Bakı Dərin Özüllər Zavodu (BDÖZ) sahəsində Azərbaycan Prezidenti İlham Əliyev tərəfindən dayaq blokunun dənizə yola salınması zamanı bildirib.

Onun sözlərinə görə, ACE layihəsi AÇG üzrə yenilənmiş müqavilənin əməldə başlandığını əks etdirir: “Layihənin ilk böyük hissəsini – ACE platformasının dayaq blokunu təhlükəsiz və qrafikə uyğun tamamlamaqdan məmnunuq. İndi biz diqqətimizi layihənin digər hissələrinə - üst tikililərə, sualtı tikinti işlərinə və dənizdə quraşdırma fəaliyyətlərinə yönəldəcəyik ki, gələn il layihənin bütöv tamamlanmasına nail olaq və ACE layihəsindən hasilatın başlanması üçün ilk quyunu qazmağa başlayaq”.

Şirkətin regional prezidenti bu mühüm mərhələnin həyata keçirilməsində göstərdikləri dəstəyə və əməkdaşlığa görə Azərbaycan hökumətinə, Azərbaycan Dövlət Neft Şirkətinə (SOCAR) və bütün tərəfdaşlara təşəkkür edib.

O, həmçinin bu nailiyyətin gerçəkləşməsində zəhməti olan hər kəsə - BP-nin, podratçı və subpodratçı təşkilatların əməkdaşlarına təşəkkür edib: “Xüsusilə də, üçillik tikinti fəaliyyətləri ərzində BP-nin texniki təhlükəsizlik standartlarına tam əməl edərək itirilmiş iş gününə səbəb ola biləcək heç bir hadisəyə yol vermədən 3 milyon saat işi təhlükəsiz yerinə yetirmiş “BOS Shelf” şirkətinə minnətdarlığımı bildirmək istəyirəm”.

Qeyd edək ki, dayaq blokunun tikintisi təhlükəsiz və qrafikə uyğun şəkildə tamamlanıb. Qurğu dənizə yola salınmaq üçün BDÖZ yanalma körpüsündə STB-1 daşıma barjasına yüklənəcək və 2023-cü ilin birinci rübündə dənizə yola salınacaq.

“BOS Shelf” tərəfindən inşa edilmiş dayaq bloku yerli tikinti infrastrukturundan və obyektlərindən istifadə edilməklə tam şəkildə ölkə daxilində quraşdırılıb. Subpodratçılar və ixtisaslaşmış təchizatçılar da daxil olmaqla tikinti işlərinə 2 000 nəfərdən çox insan cəlb olunub və işçi qüvvəsinin əksəriyyəti Azərbaycan vətəndaşları olub.

ACE platformasının dayaq blokunun çəkisi 16 000 ton, hündürlüyü 153 metrdir. Bu qurğuya biri suvurma, biri neft ixracı və biri də qaz ixracı üçün nəzərdə tutulmuş üç hasilat dik borusu daxildir. Dayaq bloku suyun 137 metr dərinliyində quraşdırılacaq.