İtalyan nazir müavini: "TAP-ın enerji resurslarının şaxələndirilməsində rolu yüksəkdir"

Energetika naziri Pərviz Şahbazovla İtaliyanın Xarici İşlər və Beynəlxalq Əməkdaşlıq nazirinin müavini Qulyelmo Pikkinin rəhbərlik etdiyi nümayəndə heyəti arasında görüş keçirilib. Bu barədə “Report”a Nazirliyin mətbuat xidmətindən məlumat verilib.

Məlumata görə,  P.Şahbazov iki ölkə münasibətlərinin bütün sahələr üzrə uğurla inkişaf etdiyini və bu əlaqələrin yüksək səviyyəli qarşılıqlı səfərlərlə daha da möhkəmləndiyini qeyd edib. İtaliya şirkətlərinin Azərbaycanda çoxşaxəli fəaliyyətinə toxunan nazir onların investor kimi fəaliyyətlərini genişləndirməsi, iqtisadiyyatın şaxələndirilməsi prosesində iştirakları üçün imkanların olduğunu bidirib. Nazir İtaliya ilə iqtisadi tərəfdaşlıqda enerji sektorunun vacib rolunu diqqətə çatdıraraq, TAP layihəsinin İtaliya istehlakçıları üçün faydalarından bəhs edib.

“Cənub Qaz Dəhlizi”nin hər iki ölkə üçün əhəmiyyət daşıdığını vurğulayan nazir müavini Qulyelmo Pikki TAP-ın enerji resurslarının şaxələndirilməsində rolunu yüksək qiymətləndirib və layihənin vaxtında başa çatması üçün mövcud dəstəyi diqqətə çatdırıb.

Görüşdə iqtisadi əməkdaşlıq üzrə Hökumətlərarası Komissiyanın cari ildə keçiriləcək 5-ci iclasına hazırlıq, eləcə də qarşılıqlı maraq doğuran digər məsələlər müzakirə edilib.