OPEC+ sammitində önəmli qərar qəbul olunmayıb

Bakı. 24 iyul. REPORT.AZ/ OPEC və ona daxil olmayan neft hasil edən ölkələrin bu gün Sankt-Peterburqda keçirilən Nazirlər Komitəsinin IV monitorinq iclasında neft bazarına təsir edəcək önəmli qərar qəbul olunmayıb. 

"Report" TASS agentliyinə istinadən xəbər verir ki, sammitdə Səudiyyə Ərəbistanı, Rusiya, Venesuela və bir neçə başqa ölkə hasilatın azaldılması ilə bağlı anlaşmanın 2018-ci il aprel ayının 1-dən sonra da uzadıla biləcəyi fikrini dəstəkləyib. Bunu Venesuelanın neft sənayesi naziri Nelson Martines bildirib. Nazir anlaşmanın nə qədər müddətə uzadılacağı barədə açıqlama verməyib.

Rusiyanın energetika naziri Aleksandr Novak isə anlaşmadan çıxışın mexanizmləri haqqında danışmağın tez olduğunu qeyd edib: "Anlaşmanın uzadılması və ya bitməsi qlobal neft ehtiyatlarının vəziyyətinə bağlı olacaq".

Qeyd edək ki, OPEC-in növbəti iclası bu ilin sentyabr ayına planlaşdırılıb. Neft bazarında hər hansı önəmli hadisə olarsa, iclasın daha tez keçirilməsinin mümkünlüyü vurğulanıb.

"Report"un analitik qrupu bildirir ki, sammitdə önəmli qərarın qəbul olunmaması neft qiymətlərinin azalmasına səbəb olacaq.