Yuxarı

Neft kəskin ucuzlaşa bilər

Ekspertlər: Dünya neft bazarında təklif tələbi xeyli üstələyir

Bakı. 28 iyun. REPORT.AZ/ Neftin qiymətləri "Brexit" referendumunun nəticələrinin açıqlanmasından sonra azalma tendensiyasını Norveç və İrandan gələn xəbərlərlə bitirərək yüksəlişə başlayıb. 

"Report" xəbər verir ki, son iki iş günündə 6,7% azalaraq 47,30 dollar/barelə çatan "Brent" markalı neftin qiyməti hazırda bu səviyyədən 2,3% yüksəkdir.

Neftin qiymətinin yüksəlməsinə səbəb Norveçdə 7 neft-qaz yatağında fəhlələrin tətil keçirmək istəməsi olub. Tətilə səbəb əmək haqqının artırılması ilə bağlı tələb olduğu bildirilir. Tətilin başlanması iyulun 2-nə planlaşdırılsa da, iyunun 30-u və iyulun 1-də danışıqların baş tutacağı gözlənilir. 

Bu barədə "Report" "Ria Novosti"yə istinadən xəbər verir. 

Xatırladaq ki, əgər tərəflər əmək haqqı ilə bağlı problemin həllində razılığa gəlməsə, tətil nəticəsində neft hasilatının azalacağı ehtimal edilir. "Reuters" agentliyindən verilən məlumata əsasən, tətil keçirilməsi planlaşdırılan yataqlarda Norveçin neft hasilatının 18%-i, qaz hasilatının isə 17%-i həyata keçirilir.

"Bloomberg" agentliyinin verdiyi məlumata əsasən, 2016-cı ilin aprel-may aylarında gündəlik 2 mln. barel neft hasil edən İran, iyunun 1-20-də hasilat 20% azalma göstərib. Ölkəyə tətbiq edilən sanksiyaların ləğv edilməsindən sonra Avropa ölkələrinə neft ixracını gündəlik 350 min barel/günə qədər yüksəldən İranın iyunun 1-20-də ixracı 18,6% azalaraq gündəlik 285 min barelə enib. Agentlik hesab edir ki, neft bazarından əldə olunan son məlumatlar neftə tələbatın azaldığını göstərir. Əgər neft hasilatı da öz növbəsində azaldılmasa, təklifin tələbi üstələməsi neft qiymətlərini kəskin şəkildə aşağı salacaq.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi