​"Neft Daşları" yatağında yeni estakadayanı meydança inşa olunacaq

​"Neft Daşları" yatağında yeni estakadayanı meydança inşa olunacaq Meydançadan qazılacaq quyuların hər birindən sutkada 10 ton neft hasil ediləcəyi gözlənilir
Energetika
38
27 Aprel , 2015 15:32
​Neft Daşları yatağında yeni estakadayanı meydança inşa olunacaq

Bakı. 27 aprel. REPORT.AZ/ “Neft Daşları” yatağında yeni blok tipli 331 saylı estakadayanı meydança quraşdırılacaq. Bu barədə "Report"a Azərbaycan Dövlət Neft Şirkətinin (SOCAR) mətbuat xidmətindən məlumat verilib.

“Neft Daşları” NQÇİ-nin sifarişilə “Neftqazelmitədqiqatlayihə” İnstitutunun layihəsi əsasında inşa olunacaq estakadayanı meydançanın baş podratçısı “Neftqaztikinti” Trestidir.

Qeyd olunur ki, 10 istismar quyusunun qazılması üçün nəzərdə tutulan meydança dənizin 8 metr dərinliyində yerləşdiriləcək. Meydançada müasir qazma avadanlığı, 37 nəfərlik yaşayış bloku, qaldırıcı kranlar, korroziyadan mühafizə sistemi, minik və yanalma meydançaları, elektrik enerjisi ilə təchizatın etibarlılığını təmin etmək məqsədilə dizel elektrik generatorları və digər zəruri avadanlıqlar quraşdırılacaq. İnşaat və istismar müddətində meydançada ətraf mühitin mühafizəsi bütün müasir norma və tələblərə uyğun şəkildə təmin ediləcək.

Bununla yanaşı bildirilir ki, estakadayanı meydançanın tikintisinin 2016-cı ilin sonuna kimi başa çatdırılması planlaşdırılır. Meydançadan qazılacaq quyuların hər birindən sutkada 10 ton neft hasil ediləcəyi gözlənilir.