"Neft Daşları''nda su xəttinin çəkilməsi işləri başa çatıb

Bakı. 22 iyun. REPORT.AZ/ Azərbaycan Dövlət Neft Şirkətinin (SOCAR) “Neftqaztikinti” Tresti “Azneft” İstehsalat Birliyinin sifarişi ilə ''Neft Daşları'' yatağındakı 619-810 saylı estakadayanı meydançalar və 810 saylı meydança ilə 1887 saylı stasionar dəniz özülü arasında yüksək təzyiqli su xəttinin çəkilməsi məqsədi ilə həyata keçirdiyi layihə üzrə tikinti-quraşdırma işlərini uğurla yerinə yetirib. Bu barədə "Report"a SOCAR-ın mətbuat xidmətindən məlumat verilib.

Layihə çərçivəsində Trest tərəfindən 619-810 saylı estakadayanı meydançalar arasında uzunluğu 2,7 km və 810 saylı estakadayanı meydança ilə 1887 saylı SDÖ arası uzunluğu 2,1 km olan boru xətti çəkilib. Məhsuldarlığı gün ərzində 1 500 kubmetr olan borunun işçi təzyiqi 10,0 MPa, diametri 300 mm-dir. Layihə üzrə işlərə 2014-cü ilin sentyabrında başlanılıb və bu ilin mayında sona çatdırılmış tikinti-quraşdırma işləri “Neftqaztikinti” Trestinin 2 saylı Tikinti-Quraşdırma İdarəsi tərəfindən yerinə yetirilib.