Energetika naziri: "SGC-nin ikinci fazasının icrası üçün Azərbaycanın kifayət qədər qaz ehtiyatları var"

Energetika naziri: "SGC-nin ikinci fazasının icrası üçün Azərbaycanın kifayət qədər qaz ehtiyatları var"
Energetika
114
28 Fevral , 2020 17:43
Energetika naziri: SGC-nin ikinci fazasının icrası üçün Azərbaycanın kifayət qədər qaz ehtiyatları var
Energetika naziri Pərviz Şahbazov / Report / Firi Salim

"Gələcəkdə Cənub Qaz Dəhlizinin (SGC) tutumunu artırmaq mümkündür".

“Report” xəbər verir ki, bunu Bakıda keçirilən Cənub Qaz Dəhlizi Məşvərət Şurası çərçivəsində nazirlərin VI iclasından sonra mətbuat konfransında Energetika naziri Pərviz Şahbazov bildirib.

Onun sözlərinə görə, SGC-yə daxil olan ayrı-ayrı layihələr üzrə kəmərlərin tutumları fərqli artırıla bilər: "Cənubi Qafqaz Boru Kəməri" və TANAP birlikdə 31 mlrd. kubmetrə, TAP isə 2 dəfə artırılaraq 20 mlrd. kubmetrə çatırıla bilər".

Nazir qeyd edib ki, layihənin ikinci fazasının icrası üçün Azərbaycanın kifayət qədər qaz ehtiyatları var.

Qeyd edək ki, Cənub Qaz Dəhlizi layihəsi Xəzərin Azərbaycan sektorunda yerləşən “Şahdəniz” qaz-kondensat yatağının istismarının ikinci mərhələsi çərçivəsində hasil olunan qazın boru kəmərləri ilə Türkiyə və Avropaya nəqlini nəzərdə tutur. “Şahdəniz-2” layihəsi, Cənubi Qafqaz Boru Kəmərinin Genişləndirilməsi, Türkiyə ərazisində inşa olunmuş Trans-Anadolu Boru Kəməri (TANAP), Yunanıstan, Albaniya və Adriatik dənizinin dibi ilə Cənubi İtaliyaya qədər uzanacaq Trans-Adriatik Boru Kəməri (TAP) Cənub Qaz Dəhlizinin əsas komponentləridir. Cənub Qaz Dəhlizinin böyük hissəsinin icrası yekunlaşıb. Artıq 2018-ci ilin iyunun sonundan Türkiyəyə TANAP vasitəsilə kommersiya qazı nəql olunur. Ötən il noyabrın 30-da TANAP-ın Avropaya qaz nəqli üçün nəzərdə tutulan hissəsinin açılışı keçirilib. Cənub Qaz Dəhlizinin sonuncu komponenti olan TAP-ın 92%-i yekunlaşıb. Bu il TAP vasitəsilə Azərbaycan qazının Avropaya nəqli nəzərdə tutulur.

“Cənub Qaz Dəhlizi” QSC ölkə Prezidentinin “Şahdəniz qaz-kondensat yatağının istismarının ikinci mərhələsi və Cənub Qaz Dəhlizinin yaradılmasına dair digər layihələrlə bağlı bəzi tədbirlər haqqında” 2014-cü il 25 fevral tarixli sərəncamı əsasında yaradılıb. QSC-nin səhmlərinin 51%-i dövlət mülkiyyəti olmaqla İqtisadiyyat Nazirliyinə, 49%-i isə SOCAR-a məxsusdur. “Cənub Qaz Dəhlizi” QSC Azərbaycandan Avropaya təbii qazın çatdırılması üçün hazırda inşası davam edən, uzunluğu 3 500 km-dən artıq olan və Avropa İttifaqı tərəfindən dəstəklənən Cənub Qaz Dəhlizi beynəlxalq qaz layihəsində Azərbaycanın maraqlarını təmsil edən şirkətdir.