Conatan Elkind: “Azərbaycan Avropanın enerji təhlükəsizliyində mühüm rol oynayır”

“Azərbaycan təbii qazının “Şahdəniz” yatağından İtaliyaya çatdırılması böyük əhəmiyyət kəsb edir. Ümumiyyətlə, bu ölkə Avropada enerji böhranının həllində mühüm rol oynayır”.

“Report” xəbər verir ki, bunu Kolumbiya Universitetinin Qlobal Enerji Siyasəti Mərkəzinin baş elmi işçisi Conatan Elkind jurnalistlər üçün keçirilən dəyirmi masada deyib.

Onun sözlərinə görə, Avropa əvvəllər Rusiyadan ildə 155 milyard kubmetr qaz idxal edirdi və bu, Almaniya kimi bir sıra ölkələr üçün çox vacib idi, çünki bu ölkədə bir çox sənaye müəssisələri idxal olunan bu ucuz yanacaqla fəaliyyət göstərirdi.

C.Elkind bildirib ki, təchizatla bağlı fasilələr və problemlər təbii qazın qiymətinin kəskin artmasına səbəb olub: “Bu gün Norveç Avropada mühüm qaz təchizatçısıdır. Lakin bu dövrdə Avropanın alternativ yanacaq mənbəyinə ciddi ehtiyacı var idi və burada Azərbaycan öz rolunu oynayıb”.

O xatırladıb ki, doğrudur Azərbaycandan nəql olunan təbii qazın həcmi Rusiya qədər böyük deyil: “Amma hasilatın artırılması üçün istehsalat bazasının daha da genişləndirilməsi və yataqların işlənilməsi imkanları var”.

Bu gün Avropa hələ də Rusiyanın Ukraynaya müdaxiləsi nəticəsində yaranan enerji böhranı ilə üz-üzədir və bunun nəticələri bütün dünyada hiss olunur: “Əslində məhz bu amil dünyada böhrana gətirib çıxarıb. Yəni böhranın nəticələri təkcə Avropa qitəsində deyil, həm də təbii qazın və ümumilikdə enerji resurslarının qiymətinin kəskin şəkildə artdığı bütün dünyada hiss olunur. Neft və təbii qazdan başqa, iqtisadiyyatın digər sahələrinə ağır zərbə dəyib. Məsələn, taxıl və digər ərzaq məhsullarının tədarükü sahəsinə. Bütövlükdə, enerji böhranının həllində Azərbaycanın rolu böyük və çox mühümdür”.