Yuxarı

​Çilov adasında nəqliyyat vasitələrinin ekoloji müayinəsi müsbət nəticələnib

Bunun üçün SOCAR-ın Ekoloji Ölçmə Mərkəzinin əməkdaşları Çilov adasına ezam edilib

Bakı. 27 avqust. REPORT.AZ/ Azərbaycan Dövlət Neft Şirkətinin (SOCAR) Ekologiya İdarəsi “Təmiz hava” aylığı cərçivəsində bu il dənizdə istismar olunan nəqliyyat vasitələrinin də Ekoloji Ölçmə Mərkəzi tərəfindən müayinədən keçirilməsini qərara alıb. Bu barədə "Report"a SOCAR-ın mətbuat xidmətindən məlumat verilib.

Bunun üçün Mərkəzin əməkdaşları Çilov adasına ezam edilib, SOCAR-ın Nəqliyyat İdarəsinin 5 saylı Texnoloji Nəqliyyat Departamentində istismar olunan avtomobillər və xüsusi texnika müasir qazanalizator cihazları vasitəsilə ölkədə qüvvədə olan standartlara uyğun müayinədən keçirilib. Müayinələrin nəticəsi qənaətbəxş olub.

Ekspertlərin rəyinə əsasən, uğurun başlıca səbəbi SOCAR-ın həyata keçirdiyi ekoloji proqram çərçivəsində istismarda olan avtomobillərdən atılan zərərli qazların miqdarına mütəmadi nəzarət edilməsi və mühərriklərin yanacaq sistemlərinin daim saz vəziyyətdə saxlanılmasıdır.

Qeyd edək ki, dövlət başçısı tərəfindən təsdiq edilmiş Azərbaycanda demoqrafiya və əhali sakinliyinin inkişafı sahəsində Dövlət Proqramının icrası ilə əlaqədar, avtonəqliyyat vasitələri tərəfindən atmosferin çirklənməsinə nəzarətin gücləndirilməsi məqsədilə təsdiq olunmuş birgə tədbirlər planına uyğun olaraq avqustun 1-dən 31-dək ölkə ərazisində “Təmiz hava” aylığı keçirilir.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi