Yuxarı
    Bağlamaq

    "Bulla-dəniz" dəniz yatağında yeni stasionar özül istismara verilib

    Mərasimdə SOCAR prezidenti Rövnəq Abdullayev və şirkət rəhbərliyinin nümayəndələri iştirak ediblər

    Bakı. 2 may. REPORT.AZ/ Bu gün Azərbaycan Dövlət Neft Şirkətinin (SOCAR) prezidenti Rövnəq Abdullayev və şirkət rəhbərliyinin nümayəndələri “Bulla-dəniz” yatağında yeni inşa edilmiş 6 saylı stasionar dəniz özülünün istismara verilməsi mərasimində iştirak ediblər.

    "Report" şirkətə istinadən xəbər verir ki, SOCAR prezidenti özüldə çalışan neftçilərlə görüşərək, onları bu əlamətdar hadisə münasibətilə təbrik edib, onlara uğurlar arzulayıb. Özülə baxış keçirən şirkət prezidentinə məlumat verilib ki, SOCAR-ın daxili imkanları ilə 2014-cü ildən inşasına başlanmış bu özülün layihəsi “Neftqazelmitədqiqatlayihə” İnstitutu tərəfindən verilib, istismara hazır vəziyyətdə olan birinci buraxılış kompleksi üzrə tikinti işləri “Neftqaztikinti” Tresti tərəfindən həyata keçirilib. 1 ədəd axtarış və 3 ədəd istismar quyusunun qazılması üçün nəzərdə tutulan özül dənizin 19-20 metr dərinliyində quraşdırılıb. Yaşayış və istehsalat hissələrindən ibarət özülün ümumi sahəsi 5 350 kv. metrdir. İstehsalat hissəsi 9 dayaq bloku və 10 aralıq seksiyasından, yaşayış hissəsi isə 2 dayaq bloku və 1 aralıq seksiyasından ibarətdir. Blokların hündürlüyü 32 metrdir. İstehsalat hissəsini yaşayış hissəsi ilə hər birinin uzunluğu 33 metr olan 2 körpü əlaqələndirir. Özüldə 1 ədəd vertolyot, 10 ədəd gəmi yanalma və 4 ədəd minikdüşmə meydançası quraşdırılıb, işçi personalının rahat və təhlükəsiz çalışması üçün 88 nəfərlik vaqon tipli yaşayış evi, 21 sanitar qovşağı, məişət evcikləri, çamaşırxana inşa edilib. Özül yükqaldırma qabiliyyəti 4-28 ton olan 3 ədəd stasionar qaldırıcı kran, 3 ədəd 42 nəfərlik xilasedici qayıq, 9 ədəd 10 nəfərlik xilasedici sal, bioloji sutəmizləmə qurğusu, dəniz suyunu şirinləşdirən qurğu, ventilyasiya, isitmə-soyutma və yanğınsöndürmə sistemləri, nəzarət ölçü cihazları və digər zəruri avadanlıqlarla təchiz edilib, radioəlaqə və avtomatika işləri yerinə yetirilib. Bundan başqa, elektrik enerjisi ilə təchizatın etibarlılığını təmin etmək məqsədilə özüldə 2 ədəd dizel elektrik generatoru quraşdırılıb. 

    Özüldə ətraf mühitin mühafizəsi, təhlükəsizlik texnikası, yanğından mühafizə üzrə qabaqlayıcı tədbirlər də ən yüksək norma və tələblər səviyyəsində yerinə yetirilib. Qeyd olunub ki, özüldə 5 900 - 6 300 metr dərinliyə qazılacaq quyuların hər birindən sutkada 150 ton kondensat və 500 min kubmetr qaz hasil ediləcəyi nəzərdə tutulur. Qazma işlərini yerinə yetirmək üçün müasir standartlara cavab verən “Drilmec 3000 HP land” yeni qazma qurğusundan istifadə ediləcək. Bu qurğu vasitəsilə 8 000 metrdən artıq dərinliyə malik quyuların qazılması mümkündür. Özüldə qazma işləri ilə istismarın eyni zamanda aparılması nəzərdə tutulub. İstismar işləri N.Nərimanov adına NQÇİ tərəfindən həyata keçiriləcək. 

    İnşaat işlərinin müasir texnika və texnologiyalardan istifadə edilərək beynəlxalq standartların tələblərinə uyğun təhlükəsiz və keyfiyyətlə həyata keçirildiyini söyləyən SOCAR-ın prezidenti görülmüş işlərdən razılığını bildirib, özüldə qazılacaq ilk axtarış quyusunda qazma dəzgahını işə salıb. SOCAR prezidentinə məlumat verilib ki, layihə dərinliyi 5 900 metr olan 78 nömrəli şaquli quyu Məhsuldar Qatın VIII horizontunun neft-qazlılığını öyrənmək, sahənin tektonikasını və litoloji-stratiqrafik kəsilişini dəqiqləşdirmək məqsədilə "SOCAR-AQŞ" birgə müəssisəsi tərəfindən qazılacaq. Əvvəllər özülün yaxınlığında qazılmış quyulardan əldə edilmiş nəticələr “Bulla-dəniz” yatağının şimal-şərq qanadının V və VI tektonik bloklarında məhsuldar qatın VIII horizontunun qaz-kondensat ehtiyatlarına malik olmasına zəmin yaradıb. Qazma prosesi ən müasir və yüksək keyfiyyətli avadanlıqlar vasitəsilə həyata keçiriləcək, quyunun işinə nəzarət və geofiziki-ölçmə işləri dünya standartlarına uyğun aparılacaq. 

    R.Abdullayev qazmaçılarla söhbət zamanı bildirib ki, Azərbaycan Prezidenti İlham Əliyevin Dövlət Neft Şirkəti qarşısında qoyduğu vəzifələrin həyata keçirilməsi məqsədilə aparılan kompleks tədbirlər çərçivəsində hasilat və kəşfiyyat işlərinin genişləndirilməsinə xüsusi diqqət yetirilir. “Bulla-dəniz” yatağında hasilatın stabil saxlanması və artırılması baxımından yeni özülün əhəmiyyətini vurğulayan R.Abdullayev obyektin vaxtında və keyfiyyətlə istismara buraxılmasını yüksək qiymətləndirib, ölkənin neft-qaz təsərrüfatının yaxşılaşdırılması, durmadan artan hasilat və nəql infrastrukturunun genişləndirilməsi sahəsində həyata keçirilən tədirlərin bundan sonra da davam etdiriləcəyini söyləyib.                               

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi