“BP-Azerbaijan”: Şirkətdə 2 817 nəfər Azərbaycan vətəndaşı çalışır

Bakı. 21 fevral. REPORT.AZ/ 2016-cı ilin sonuna “BP-Azerbaijan” şirkətinin işçiləri olan Azərbaycan vətəndaşlarının sayı 2 817 nəfər olub.

“Report” şirkətə istinadən xəbər verir ki, bura müddətli müqavilə əsasında işləyən işçilər də daxildir. “Şirkətin Azərbaycanda ixtisaslı işçilərinin təxminən 87%-ni yerli mütəxəssislər təşkil edir ki, bunların da çoxu rəhbər vəzifələrdədir, o cümlədən şirkətin regional rəhbər heyətinin tərkibinə altı azərbaycanlı daxildir. Onların 3-ü vitse-prezident vəzifəsinə 2016-cı ildə təyin olunub.

BP-nin 2018-ci ilin sonunadək ixtisasalı işçilərinin 90%-ni milli kadrlar təşkil edəcəyi barədə öhdəliyi var. Bu o deməkdir ki, ixtisaslı işçi tələb edən bir sıra vəzifələrdə yerli kadrlar xarici vətəndaşları əvəz edəcəklər”. Qeyd edilib ki, ixtisası olmayan işçilər isə artıq 100% yerli vətəndaşlardan ibarətdir: “İşçilərin milliləşdirilməsi planına həmçinin BP-nin təlim və inkişaf proqramlarının daha da optimallaşdırılması, yüksək səviyyəli kadrlar üzrə yerli bazarı daha da yaxşılaşdırmaq məqsədilə dövlət və özəl sektorun təşəbbüslərində yaxından iştirak daxildir”.