Yuxarı

Baş mühəndis: "İlkin ehtimalla, yanan qaz quyularıdır"

Balamirzə Ağarəhimov: Baş vermiş hadisə əməyin mühafizəsi və təhlükəsizlik texnikası qaydalarının pozulması ilə əlaqədar baş verməyib

Bakı. 8 dekabr. REPORT.AZ/ "Baş vermiş hadisə əməyin mühafizəsi və təhlükəsizlik texnikası qaydalarının pozulması ilə əlaqədar baş verməyib". "Report" xəbər verir ki, bunu SOCAR-ın "Azneft" İstehsalat Birliyinin baş mühəndisi Balamirzə Ağarəhimov bu gün keçirdiyi mətbuat konfransında bildirib.

O qeyd edib ki, yüksək sürətli "uraqan" statuslu küləyin olması "Günəşli" yatağının 10-cu dərin dəniz özülündə bu bədbəxt hadisənin baş verməsinə səbəb olub: "Ümumilikdə, SOCAR-ın strukturlarında təhlükəsizliyin təmin olunması, əməyin mühafizəsi ilə əlaqədar görülən işlər davamlı bir prosesdir. Həmişə görülüb, indi də görülür və gələcəkdə də görüləcək".

Baş mühəndis bildirib ki, yanğın hazırda quyularda gedir: "Yanğın quyulardan başqa yerdə getmir, ilkin ehtimalla, yanan qaz quyularıdır. Orada 28 qaz quyusu var, onlardan bir neçəsi yanır - 28 quyunun hamısı yanmır. Çünki o quyuların 80%-i qazliftlə işlədiyinə görə, qazlift kəsilən kimi avtomatik şəkildə özləri dayanır".

B.Ağarəhimov qeyd edib ki, qəza baş verən günü havanın küləkli olması, yanğının tez söndürülməməsi, quyularda, avadanlıqlarda deformasiya yaradıb, bu da bəzi quyularda yanğına səbəb olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi