Bakının Binəqədi rayonunda qaz xətləri təmir edilir - VİDEOREPORTAJ

Bakı. 7 fevral. REPORT.AZ/ Azərbaycan Dövlət Neft Şirkətinin (SOCAR) “Azəriqaz” İstehsalat Birliyi Bakının Binəqədi rayonunda təbii qaz xətlərini təmir edir. 

Bununla bağlı "Report"a açıqlama verən qurumun ictimaiyyətlə əlaqələr şöbəsinin rəisi İbrahim Kərbəlayev bildirib ki, hazırda rayonun 6-ci mikrorayon, Bağ Park ərazisindəki evlərin altından keçən orta təzyiqli qaz kəmərinin kənarlaşdırılması üçün 500 metrə yaxın 315 mm-lik polietilen yeraltı qaz xətti çəkilir. 

Bundan başqa, onun sözlərinə görə, Biləcəri qəsəbəsindəki dəmir yolu stansiyasının çeşidləmə məntəqəsində müxtəlif diametrli 1 000 metrdən artıq qaz kəmərinin əsaslı təmiri və rənglənməsi, Rəsulzadə qəsəbəsində, İ.Hacıyev, A.Nemətulla, Q.Hacıbababəyov və A.Hüseynov küçələrində müxtəlif diametrli 3 200 metrə yaxın qaz xətlərinin təmiri, rənglənməsi, mövcud qaz sayğacların əvəz olunacaq qaz xətti üzərinə köçürülməsi və şkaf tipli qaz tənzimləyici məntəqələrin quraşdırılması, eyni zamanda Binəqədi qəsəbəsi 2-ci mədən ərazisində qaz xətlərinin əsaslı təmiri işləri aparılmaqdadır. 

"İşlərin 70%-i artıq yekunlaşıb. Artıq tamamlanma işləri gedir. Yaxın günlərdə əhaln tam şəkildə təbii qazla təmin ediləcək", - deyə o, qeyd edib. 

Video: Rəşad Tuncay