Azərbaycanda avtomobil benzini istehsalı 7% artıb

Azərbaycanda avtomobil benzini istehsalı 7% artıb Bu il sentyabrın 1-nə ölkədə 11 min ton avtomobil benzini ehtiyatı olub
Energetika
15 Sentyabr , 2017 17:12
Azərbaycanda avtomobil benzini istehsalı 7% artıb

Bakı. 15 sentyabr. REPORT.AZ/ Bu ilin yanvar-avqust ayları ərzində Azərbaycanda neft məhsullarının istehsalı sahəsində istehsalın ümumi dəyəri 1 748,9 mln. manat olub.

“Report”un Dövlət Statistika Komitəsinə istinadən verdiyi xəbərə görə, istehsalın dəyəri əvvəlki ilin yanvar-avqust ayları ilə müqayisədə 7,9% azalıb.

Hesabat dövründə 783,8 min ton avtomobil benzini istehsal olunub ki, bu da əvvəlki ilin müvafiq dövründən 7% artıqdır.

Bu il sentyabrın 1-nə 11 min ton avtomobil benzini ehtiyatı olub.

İlin səkkiz ayı ərzində 124,5 min ton neft-kimya sənayesində istifadə üçün benzin, 22,8 min ton sürtkü yağları, 130,8 min ton neft bitumu, 137,2 min ton neft koksu istehsal edilib.

Neft-kimya sənayesində istifadə üçün benzin istehsalında 3,8%, sürtkü yağlarının istehsalında 3 dəfə, neft bitumunun istehsalında 16%, neft koksunun istehsalında 13% artım qeydə alınıb.

Hesabat dövründə 392,5 min ton ağ neft, 1 215,9 min ton dizel yanacağı, 252 min ton yanacaq mazutu istehsal edilib.

Ağ neftin istehsalı 5,9%, yanacaq mazutunun istehsalı 39,5%, dizel yanacağının istehsalı 18,5% azalıb.