Yuxarı

Azərbaycan və ​İran nanotexnologiyaların tətbiqinə dair üçtərəfli protokol imzalayıb

Sənəd İranın neft ehtiyatlarının hasilatında və nəqlində SOCAR-ın nanotexnologiyalarının tətbiqini nəzərdə tutur

Bakı. 28 aprel. REPORT.AZ/ Bu günlərdə İran Milli Neft Şirkətinin dəvətilə Azərbaycan Dövlət Neft Şirkətinin (SOCAR) nümayəndə heyəti İranda səfərdə olub. Bu barədə "Report"a SOCAR-ın mətbuat xidmətindən məlumat verilib.

İranın Ofşor Neft Şirkətinin və Neft Sənayesi Elmi Tədqiqat İnstitutunun nümayəndələri ilə “Texnologiyaların transferi” mövzusunda keçirilmiş görüşdə SOCAR-ın işlədiyi nanotexnologiyalar, bu texnologiyaların əsas xüsusiyyətləri və tərəflərin niyyətləri müzakirə edilib, əməkdaşlığın istiqamətləri müəyyənləşdirilib.

Məlumata görə, bu ilin fevral ayında İran Milli Neft Şirkətinin Neft Sənayesi Elmi Tədqiqat İnstitutunun əməkdaşlarından ibarət nümayəndə heyəti Azərbaycan Dövlət Neft Şirkətində olub, SOCAR-ın birinci vitse-prezidenti Xoşbəxt Yusifzadə ilə aparılmış danışıqlarda əməkdaşlıq perspektivləri, xüsusilə İranın neft yataqlarında SOCAR-ın nanotexnologiyalarından istifadə məsələləri müzakirə olunub, ikitərəli əlaqələrin daha da dərinləşməsinin vacibliyi önə çəkilib.

İran səfərinin sonunda bu ölkənin neft ehtiyatlarının hasilatında və nəqlində SOCAR-ın nanotexnologiyalarının tətbiqi ilə bağlı Dövlət Neft Şirkətinin Nanotexnologiyalar Departamenti, İran Milli Neft Şirkətinin Neft Sənayesi Elmi Tədqiqat İnstitutu və İranın Ofşor Neft Şirkəti arasında üçtərəfli əməkdaşlıq protokolu imzalanıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi