Yuxarı
    Bağlamaq

    Azərbaycan və CEER enerji sektorunda tənzimləyici orqanın fəaliyyətini müzakirə edib

    Bakı. 22 fevral. REPORT.AZ/ Energetika Nazirliyində enerji məsələləri üzrə tənzimləyici orqanın yaradılması mərhələsinin ardıcıllığına dair beynəlxalq təcrübənin mübadiləsi məqsədilə Avropa Yenidənqurma və İnkişaf Bankı (EBRD), Avropa Enerji Tənzimləyiciləri Şurası (CEER) və dövlət qurumlarının nümayəndələrinin iştirakı ilə tədbir keçirilib.

    Nazirlikdən “Report”a verilən məlumata görə, energetika nazirinin müavini Samir Vəliyev müstəqil tənzimləyici orqanın yaradılmasını enerji sektorunun liberallaşdırılması və investorların cəlb edilməsi, eləcə də müvafiq sahədə keyfiyyətli xidmətin təmin olunması istiqamətində atılan mühüm addımlardan biri kimi qiymətləndirib. O, kommunal xidmətlər sektorunun inkişafına dair Strateji Yol Xəritəsində əksini tapan bu prioritetin həyata keçirilməsi məqsədilə “Enerji Məsələlərini Tənzimləmə Agentliyi”nin yaradıldığını qeyd edib. Bildirib ki, yeni yaradılmış tənzimləyici orqanının fəaliyyət göstərməsi üçün tələb olunan hüquqi və institusional islahatların hazırlanması və icrasına texniki yardımla bağlı EBRD ilə əməkdaşlıq çərçivəsində “Tərəfdaşlararası Tənzimləyici Yardım” layihəsi həyata keçirilir.

    “Bu layihə bizə Avropa İttifaqına üzv dövlətlərin enerji tənzimləyici orqanlarının təcübəsini öyrənməklə enerji bazarında rəqabət mühitini formalaşdırmağa kömək edəcək”, - deyə nazir müavini bildirib.

    EBRD-nin Azərbaycan ofisinin rəhbəri İvana Duarte isə Bank və Energetika Nazirliyi arasında imzalanmış Niyyət Protokolunu xatırladaraq müstəqil tənzimləyici orqanın fəaliyyətinin təmin edilməsi məqsədilə lazımi dəstəyin veriləcəyini deyib.

    Daha sonra, CEER-in ekspertləri Rolands İrklis, Sarin Abado və Daniel Leliefeld Latviya, Avstriya və Niderlandın enerji sektorunda tənzimləyici orqanlarının keçdiyi inkişaf yolu, məqsədləri, funksiya və vəzifələri barədə təqdimatlarla çıxış ediblər. Bildirilib ki, tənzimləyici orqanının yaradılması uzun bir proses olsa da, enerjinin topdansatış, ötürmə, paylama və pərakəndə satış həlqələrinin bir-birindən ayrılmasını təmin etməklə bazarda rəqabətin, sabit vəziyyətin formalaşmasına və investisiya cəlbinə əsas yaradır. Bu orqanın tarif müəyyənləşdirməsi, qanun və qaydaların hazırlanmasında iştirakı, monitorinq və nəzarət vasitəsi ilə izlədiyi başlıca məqsəd istehlakçıların marağının qorunmasından ibarətdir. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi