Yuxarı
    Bağlamaq

    Azərbaycan OPEC qarşısındakı öhdəliyini iyunda da yerinə yetirib

    Cari ilin iyun ayı ərzində ölkə üzrə gündəlik neft hasilatı 793,7 min barel olub

    Bakı. 3 iyul. REPORT.AZ/ Neft İxrac edən Ölkələr Təşkilatına (OPEC) üzv olan və kartelə daxil olmayan ölkələrin neft hasilatının azaldılması ilə bağlı Vyana razılaşmasına uyğun olaraq, Azərbaycan cari ilin iyun ayı ərzində gündəlik neft hasilatı ilə bağlı məlumatları Birgə Monitorinq Komitəsinin Müştərək Texniki Komissiyasına təqdim edib. 

    Bu barədə “Report”a Azərbaycan Energetika Nazirliyindən məlumat verilib.

    Həmin məlumatlara əsasən, cari ilin iyun ayı ərzində respublika üzrə gündəlik neft hasilatı 793,7 min barel olub. Bunun 738,7 min barelini xam neft, 55 min barelini kondensat təşkil edib. Gündəlik 624,1 min barel xam neft, 55 min barel kondensat, 21,4 min barel isə neft məhsulları ixrac edilib. İlin birinci yarısı üçün bağlanmış neft hasilatının azaldılması üzrə sazişə müvafiq olaraq Azərbaycan hasilatı sutkada 35 min barel azaltmaqla bağlı götürdüyü öhdəliyi tam yerinə yetirib.

    Qeyd edək ki, ölkə üzrə gündəlik neft hasilatı yanvar ayı ərzində 793,9 min barel, fevral ayında 776,4 min barel, mart ayında 733,3 min barel, aprel ayında 781,1 min barel, may ayında isə 785,3 min barel olub.

    Xatırladaq ki, ötən il noyabrın 30-da OPEC üzrə gündəlik neft hasilatının 1,2 mln. barel azaldılaraq 32,5 mln. barelə endirilməsi barədə razılıq əldə olunub. Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barel azaldılması barədə sazişə imza atıb. 25 may 2017-ci il tarixində OPEC Nazirlər Şurasının 172-ci iclası çərçivəsində kartelin üzv və qeyri-üzv dövlətləri arasında neft hasilatının azaldılmasına dair sazişin müddətinin 2018-ci ilin birinci rübünədək uzadılması barədə razılıq əldə olunub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi