Yuxarı
    Bağlamaq

    Azərbaycan neftinin ölkələr üzrə ixrac göstəricisi açıqlanıb

    Ötən il Azərbaycan neftinin əsas alıcısı İtaliya olub

    Bakı. 4 mart. REPORT.AZ/ Azərbaycan Dövlət Neft Şirkəti (SOCAR) 2015-ci il ərzində Ceyhan, Supsa və Novorossiysk limanlarından 20-dən çox ölkəyə xam neft ixrac edib. Bu barədə "Report"un sorğusuna cavab olaraq SOCAR-ın Marketinq və İqtisadi Əməliyyatlar İdarəsindən bildirilib.

    Bu ölkələr sırasında ilk yeri İtaliya (ümumi ixracın 25%-i), sonrakı yerləri isə Almaniya (14%) və İsrail (10%) tutur. Asiya istiqamətinin ümumi ixracda payı 20%-ə yaxın olub.

    Qeyd edək ki, SOCAR 2015-ci ildə Ceyhan limanından 17 931 459 ton, Supsa limanından 2 794 905 ton, Novorossiysk limanından 1 270 108 ton xam neft ixrac edib.

    SOCAR tərəfindən ixrac olunmuş xam neftin göstəriciləri həm Azərbaycan dövlətinə, həm də şirkətin özünə məxsus xam neft həcmlərini əks etdirir.

    Azərbaycan nefti Qara dəniz limanına Bakı-Novorossiysk boru kəməri vasitəsilə Rusiya ərazisindən keçməklə nəql olunur. Bu kəmərin ümumi uzunluğu 1 330 km-dir və kəmərlə ilk neft 1997-ci il oktyabrın 25-də dünya bazarına çıxarılıb.

    Supsa limanına xam neft Bakı-Supsa kəməri adlandırılan Qərb İxrac Boru Kəməri vasitəsilə nəql olunur. Bu boru kəməri ilə Xəzərin Azərbaycan sektorundakı “Azəri-Çıraq-Günəşli” yataqlar blokundan çıxarılan neftin bir hissəsi dünya bazarına daşınır. Kəmər 1999-cu il aprelin 17-də istifadəyə verilib, illik ötürücülük qabiliyyəti 7 mln. tondur.

    Azərbaycan nefti Bakı-Tbilisi-Ceyhan boru kəməri vasitəsilə Ceyhan limanına nəql olunur. Bu limandan isə neft Aralıq dənizi vasitəsilə Avropa bazarına ixrac edilir. BTC boru kəməri Bakı yaxınlığındakı Səngəçal terminalından başlayır. Boru kəmərinin gündəlik ötürmə qabiliyyəti 1,2 mln. bareldir. Kəmər 2006-cı ildən istifadədir.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi