Yuxarı

Asiya İnkişaf Bankı Azərbaycanla bərpa olunan enerji mənbələri üzrə əməkdaşlığın inkişafına maraq göstərir

Bakı. 19 fevral. REPORT.AZ/ Azərbaycan energetika naziri Pərviz Şahbazov Cənub Qaz Dəhlizi Məşvərət Şurasının V iclası çərçivəsində Azərbaycanda səfərdə olan Asiya İnkişaf Bankının (AİB) Enerji bölməsinin direktoru Aşok Barqavanın rəhbərlik etdiyi nümayəndə heyəti ilə görüşüb.

Nazirlikdən “Report”a verilən məlumata görə, nazir Azərbaycanla AİB arasında energetika sahəsində mövcud əməkdaşlıq əlaqələri, bu çərçivədə həyata keçirilən elektrik şəbəkəsinin yenidən qurulması, üzən günəş panelləri sistemi ilə bağlı enerji layihələri barədə danışaraq, bankın Azərbaycanın enerji sektoruna dəstəyini yüksək qiymətləndirib.

Energetika naziri ölkənin bərpa olunan enerji potensialı və ondan istifadənin genişləndirilməsi istiqamətində görülən işlər, yaxın illərdə enerji istehsalında bərpa olunan enerjinin payının artırılması imkanları barədə ətraflı məlumat verib, bu sahədə beynəlxalq təcrübənin öyrənilməsinin əhəmiyyətini vurğulayıb. Qeyd olunub ki, xarici şirkətlər Azərbaycanda bərpa olunan enerji sektorunda əməkdaşlığa maraq göstərir. Xarici investisiyanın cəlbinə nail olmaq üçün əlverişli mühitin yaradılması vacibdir.

Aşok Barqava bərpa olunan enerji mənbələri üzrə Azərbaycanla əməkdaşlığın inkişafında maraqlı olduğunu qeyd edib. Bildirilib ki, bərpa olunan enerji mənbələrindən, xüsusilə günəş və külək enerjisidən istifadə, eləcə də enerji səmərəliliyi üzrə layihələrdə iştirak bankın diqqətindədir. Bank bu məqsədlə həyata keçiriləcək layihələrə texniki və maliyə dəstəyi göstərməyə hazırdır.

Görüşdə əməkdaşlığın perspektivlərinə dair fikir mübadiləsi aparılıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi