ABŞ-da neft hasilatı tarixi rekord həddə çatıb

Bakı. 20 iyul. REPORT.AZ/ ABŞ-da gündəlik neft hasilatı tarixi rekord həddə yaxınlaşır. "Report" xəbər verir ki, dünən ABŞ Energetika Nazirliyi Energetika İnformasiyaları Agentliyinin yaydığı həftəlik hesabata görə, 8-14 iyul həftəsində ABŞ-da neft hasilatı 32 min barel/gün və ya 0,34% artaraq 9,429 mln. barel/günə çatıb. Hesabat həftəsində ABŞ-ın kommersiya neft ehtiyatları isə 4,7 mln. barel və ya 0,94% azalaraq 490,623 mln. barelə enib. Həmçinin, benzin ehtiyatlarında ciddi azalma qeydə alınıb. Belə ki, hesabat dövründə ABŞ-ın benzin ehtiyatları 4,4 mln. barel və ya 1,9% azalaraq 231,2 mln. barelə enib.

"Report"un araşdırmaları onu göstərib ki, ABŞ-da tarixi rekord neft hasilatı 2015-ci ilin iyun ayının ilk həftəsində qeydə alınıb və 9,610 mln. barel/gün təşkil edib. Hazırda ABŞ-da neft hasilatı tarixi rekord həddən 181 min barel/gün və ya 1,88% aşağıdır. Xatırladaq ki, neft qiymətləri düşməyə başladığı 2014-cü il iyul ayından sonra ABŞ-da gündəlik neft hasilatının minimal səviyyəsi isə 2016-cı ilin iyul ayının ilk həftəsi qeydə alınıb və 8,428 mln. barel/gün təşkil edib. Hazırda ABŞ-da neft hasilatı bu səviyyədən 1,001 mln. barel/gün və ya 11,88% yuxarıdır.

ABŞ-ın kommersiya neft ehtiyatlarının maksimal səviyyəsi bu ilin mart ayının sonunda 535,543 mln. barel səviyyəsində qeydə alınıb. Neft qiymətləri düşməyə başladığı dövrdən bu günədək ehtiyatlarda minimal səviyyə isə sentyabr ayının son həftəsində 325,465 mln. barel təşkil edib. Hazırda ABŞ kommersiya neft ehtiyatları rekord səviyyədən 44,920 mln. barel və ya 8,38% aşağı, minimal səviyyədən isə 165,158 mln. barel və ya 50,7% yuxarıdır.