Yuxarı
    Bağlamaq

    "Yol hərəkəti qaydalarını yadda saxla və riayət et" mövzusunda tədbir keçirilib

    Uşaqlar və yol təhlükəsizliyi layihəsinin fəal iştirakçılarına diplomlar təqdim olunub

    Bakı. 7 may . REPORT.AZ / Təhsil Nazirliyi, Daxili İşlər Nazirliyi Baş Dövlət Yol Polisi İdarəsi və 46 saylı Məktəbdənkənar Tərbiyə İşi Mərkəzi tədris ilinin başa çatması ilə əlaqədar uşaq avtoşəhərciyində "Yol hərəkəti qaydalarını yadda saxla və riayət et" devizi altında birgə tədbir keçiriblər. "Report" xəbər verir ki, tədbirin keçirilməsində məqsəd təhlükəsiz davranış qaydalarını öyrənmək, uşaqların yol hərəkəti qaydaları barədə bilik səviyyəsini və ona əməl etmək bacarıqlarını nümayiş etdirmək olub.

    Tədbirdə Təhsil Nazirliyinin və Bakı Şəhəri üzrə Təhsil İdarəsinin nümayəndələri, Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polkovnik Kamran Əliyev, Bakı Şəhər Dövlət Yol Polisi İdarəsinin İctimaiyyətlə əlaqələr şöbəsinin rəisi, polkovnik Vaqif Əsədov, Jurnalistika və İnkişaf Mərkəzi İctimai Birliyinin rəhbəri Elməddin Muradlı və başqaları iştirak ediblər.

    Mərkəzin uşaq avtoşəhərciyi bayraqlar, şüarlar, plakatlar, stendlər və yol nişanları ilə bəzədilib. Uşaqların yolda təhlükəsizlik qaydaları, yol hərəkət nişanları ilə bağlı maarifləndirilməsi və sürücülərin diqqətinin yolda uşaq təhlükəsizliyinə yönəldilməsi məqsədilə keçirilən tədbirə qatılan "Yol hərəkəti dərnəyi"nin xüsusi formalar geyinmiş üzvləri interaktiv, öyrədici, hərəkətli və didaktik oyunlar nümayiş etdiriblər.

    Yol polisinin əməkdaşları çıxış edərək əsas diqqəti təhlükəsiz həyat üçün davranış vərdişlərinin formalaşdırılmasına yönəldilməsini tövsiyə edib və hamını qanunlara riayət etməyə çağırıblar. Digər çıxış edənlər isə yol hərəkəti qaydalarını məktəb yaşlarından öyrənməyin və buna əməl olunmasının vacibliyini vurğulayıblar.

    Tədbirin sonunda təşkilatçılar uşaqlara və onların valideynlərinə balacaların yol hərəkət qaydalarını daha yaxşı qavramasına kömək edəcək yardımçı tədris vasitələri hədiyyə ediblər. "Uşaqlar və yol təhlükəsizliyi" layihəsinin fəal iştirakçılarına 46 saylı Məktəbdənkənar Tərbiyə İşi Mərkəzinin diplomları təqdim olunub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi