Peşə məktəblərini bitirən şəxslərin işə qəbulu ilə bağlı layihə dövlət qurumlarına təqdim edilib

"İşəgötörənlərin peşə təhsilinə inteqrasiyasını stimullaşdırmaq üçün qaydalar hazırlanaraq aidiyyəti qurumlara təqdim edilib".

"Report" xəbər verir ki, bunu Peşə Təhsili üzrə Dövlət Agentliyinin direktor müavini Amil Əlili deyib.

O bildirib ki, müvafiq qurumların rəy və təklifləri Təhsil Nazirliyinə daxil olduqdan sonra layihəyə yenidən baxılacaq: "İşəgötürənlərin peşə təhsilinə inteqrasiyasını təmin etmək üçün onların təlabatı nəzərə alınmaqla kadr hazırlığı aparılmalıdır. İşəgötürənlər peşə təhsili müəssisələrinə cəlb olunan mütəxəssislərin stimullaşdırılması baxımından onlara verilən məvacibi ən azından bu sahədə olan ustanın əmək haqqına uyğunlaşdırmalıdır".