Yuxarı

Mikayıl Cabbarov: "Bu il onlarla təhsil müəssisəsinin tikintisi başa çatdırılacaq"

Bu il nazirliyin xətti ilə istər əsaslı, istərsə də yeni tikilən təhsil obyektlərinin ümumi sayı 32-dir

Bakı. 6 may. REPORT.AZ/ Təhsil naziri Mikayıl Cabbarov Dünya Bankının Azərbaycanda ali təhsilin inkişafı ilə bağlı layihələrinin müddətinin uzadılması məsələsinə aydınlıq gətirib. 

"Report"un xəbərinə görə, nazir bildirib ki, nazirlik müvafiq layihəni Dünya Bankının nümayəndələri ilə birgə işləyərək hökumətə təqdim edib: "Hazırda müxtəlif qurumlarda razılaşdırılma prosesi davam edir".

Təhsil sahəsində gedən bütün işlərin planlaşdırılmış şəkildə və müddətlərdə həyata keçirildiyini diqqətə çatdıran M.Cabbarov qeyd edib ki, nazirlik bu il ərzində ölkədə onlarla təhsil müəssisəsinin tikintisini başa çatdıraraq istismara verməyi nəzərdə tutub: "Hətta ilin əvvəllərində bir neçə kənd məktəblərinin tikintisi başa çatdırılıb və istismara verilib. Analoji şəkildə müvafiq icra strukturları da aidiyyəti üzrə işləri davam etdirir".

Nazir vurğulayıb ki, bu ilin yayında bir sıra məktəblərdə cari təmir işləri görüləcək: "Elə məktəblər var ki, onlar yenidən tikilib. Elələri də var ki, onlar əsaslı şəkildə təmir olunub. Bu il nazirliyin xətti ilə istər əsaslı, istərsə də yeni tikilən təhsil obyektlərinin ümumi sayı 32-dir. Bunların arasında əksəriyyət məktəblərin payına düşür".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi