Yuxarı

ABŞ səfiri: "Neftin qiymətinin ucuzlaşması Azərbaycan üçün ciddi problem yaratmayıb"

Robert Sekuta: Azərbaycandakı iqtisadi vəziyyət Venesuela, Nigeriyada olan vəziyyətlə müqayisə oluna bilməz

Bakı. 17 may. REPORT.AZ/ ABŞ-ın Azərbaycandakı səfiri Robert Sekuta Azərbaycan Dövlət İqtisad Universitetində (UNEC) olub.

UNEC-dən "Report"a verilən xəbərə görə, universitetin rektoru, professor Ədalət Muradovla görüşən səfir Azərbaycanda ingilis dilinin tədrisinin vəziyyəti barədə danışıb. 

Görüşdə akademik mobillik, eləcə də Fulbright proqramından istifadə edən ABŞ müəllimlərinin UNEC-də ingilis dili fənninin tədrisinə cəlb olunması məsələləri də müzakirə edilib.

Sonra səfir Robert Sekuta UNEC-in Beynəlxalq İqtisadiyyat Məktəbinin tələbələri ilə görüşərək, dünya iqtisadiyyatındakı mövcud vəziyyəti şərh edib.UNEC tələbələri səfirə iqtisadi mövzuda suallarını ünvanlayıblar. Çin iqtisadiyyatının qlobal iqtisadiyyatda artan rolu, dünya birjalarında neftin dəyişən qiyməti, ABŞ-Azərbaycan iqtisadi münasibətləri, xüsusən ABŞ-ın Azərbaycana birbaşa investisiya cəlbi ilə bağlı tələbələrin sualları cavablandırılıb.

Səfir bildirib ki, Çin iqtisadiyyatının əsas inkişaf etmiş bölgələri ölkənin şərq hissəsində yerləşsə də, hazırda bu inkişaf ölkənin qərbinə doğru hərəkət etməkdədir. R.Sekuta Çinin milli valyutası yuanın dünya valyutasına çevrilməsindən danışaraq, ölkə iqtisadiyyatının son illərdə sürətlə inkişaf edərək, dünyanın ən böyük ikinci iqtisadiyyatı olduğunu tələbələrin diqqətinə çatdırıb. O qeyd edib ki, Çin iqtisadiyyatını və Çin faktorunu dünya iqtisadiyyatında nəzərə almamaq artıq mümkün deyil, hazırda yuanın dünya iqtisadiyyatına sistemli şəkildə daxil olması baş verir.

R.Sekuta çıxışında neftin qiymətinin dəyişməsinə xüsusi diqqət ayıraraq vurğulayıb ki, "qara qızıl"ın ucuzlaşmasına iki aspektdən yanaşmaq lazımdır: "İstehlakçı üçün "qara qızıl"ın qiymətinin enməsi əlbəttə ki, çox yaxşıdır. Amma neft ixrac edən ölkələr və şirkətlər üçün ucuzlaşma müsbət hal deyil deyil. Çünki "qara qızıl"ın qiymətinin aşağı düşməsi digər məhsulların qiymətlərinin aşağı düşməsi ilə yanaşı, neft şirkətlərində çalışan işçilərin ixtisarına və nəticədə işsizliyə gətirib çıxarır". 

R.Sekuta vurğulayıb ki, neftin qiymətinin bugünki vəziyyəti bir çox ölkələr üçün problemlər yaradıbsa, Azərbaycan üçün bunu demək olmaz: "Çünki Azərbaycandakı iqtisadi vəziyyət Venesuela, Nigeriyada olan vəziyyətlə müqayisə oluna bilməz".

Səfir həmçinin, ABŞ şirkətlərinin investisiya siyasətinə də toxunub. O bildirib ki, ölkəsinin şirkətləri istənilən halda Azərbaycanın enerji sektorunda aktiv iştirak etməkdə davam edəcək. 

Səfir eyni zamanda, ölkəsinin iş adamlarının Azərbaycanın turizm və informasiya texnologiyaları sektorlarına diqqət ayıra biləcəyini də vurğulayıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi