Yuxarı

Doktorantların 78,6 faizi fəlsəfə üzrə təhsil alıb

Doktorantların 78,6 faizi fəlsəfə üzrə təhsil alıb

Cari ilin əvvəlinə ölkədə elmi kadr potensialının artırılmasında böyük rola malik 119 ali təhsil müəssisəsi və elmi təşkilatda doktoranturalar fəaliyyət göstərib və onlarda 54,8 faizi qadın olmaqla 2626 nəfər təhsil alıb. 

Dövlət Statistika Komitəsindən "Report"a verilən məlumat görə, təhsilalanların 78,6 faizi fəlsəfə, 21,4 faizi isə elmlər doktoru proqramları üzrə təhsil alıb.

Təhsilalanların 36,1 faizi elmi müəssisə və təşkilatlarda, 63,9 faizi isə ali məktəblərdə yaradılmış doktoranturalarda təhsil alıb. Fəlsəfə doktoru proqramı üzrə bu göstərici müvafiq olaraq 32,6 və 67,4 faiz, elmlər doktoru proqramı üzrə isə 49,1 və 50,9 faiz təşkil edib.

Fəlsəfə doktoru proqramı üzrə təhsilalanların 50,3 faizi 30 yaşadək gənclər, elmlər doktoru proqramı üzrə təhsilalanların isə 23,7 faizi 40 yaşadək olan şəxslərdir.

Fəlsəfə doktoru proqramı üzrə təhsil alan 2064 nəfərin 341-i iqtisad, 285-i filologiya, 230-u texnika, 171-i riyaziyyat, 167-si aqrar, 130-u tibb, 88-i siyasi, 82-si biologiya, qalanları isə elmin digər sahələri üzrə təhsil alır.

Doktorantlardan 88 nəfər aqrar, 85 nəfər filologiya, 66 nəfər iqtisad, 64 nəfər texnika, 53 nəfər kimya, 49 nəfər biologiya, 24 nəfər tarix, 20 nəfər yer elmləri, 17 nəfər sənətşünaslıq, hər birində 16 nəfər olmaqla tibb və fizika, 64 nəfər isə digər sahələrdə elmlər doktoru proqramı üzrə təhsil alır.

2017-ci illə müqayisədə 2018-ci ildə fəlsəfə doktoru proqramı üzrə buraxılış 14,4 faiz artaraq 605 nəfər, elmlər doktoru proqramı üzrə isə 26,1 faiz artaraq 87 nəfər təşkil edib. Fəlsəfə doktoru proqramı üzrə qəbul olanların sayı 46,2 faiz, elmlər doktoru proqramı üzrə qəbul olanların sayı isə 27,9 faiz artıb və müvafiq olaraq 665 və 165 nəfər təşkil edib.

Bununla yanaşı, 2018-ci ildə fəlsəfə doktoru proqramı üzrə 808 dissertant təhkim olunub. Onların da 66,7 faizini qadınlar təşkil edib. Elmlər doktoru proqramı üzrə təhkim olunmuş dissertantların sayı isə 139 nəfəri qadın olmaqla 286 nəfərə bərabərdir. Dissertantların əsas hissəsi tibb, iqtisad, filologiya, tarix, texnika və yer elmləri sahəsində təhkim olunub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi