Bakı. 20 dekabr. REPORT.AZ/ "Regionlarda 9-cu sinifi bitirən qızların imtahanda iştirakı oğlanlardan azdır. Qızlar daha çox 9-cu sinifdən sonra məktəbi tərk edirlər".
"Report" xəbər verir ki, bunu Dövlət İmtahan Mərkəzinin (DİM) sədri Məleykə Abbaszadə "Azərbaycanda İnsan Kapitalı üzrə Forum"da deyib.
O bildirib ki, əvvəllər orta məktəbdə təhsilini yarımçıq saxlayanlar arasında imtahanda yaxşı nəticə göstərən qızlar da olurdu, amma son illər 9-cu sinifdən sonra məktəbdən çıxan qızlar əsasən buraxılış imtahanlarında aşağı nəticə qazananlardır: "Burda valideynlərin yanaşması da rol oynayır".
DİM sədrinin sözlərinə görə, Azərbaycanın elə bölgələri var ki, orda məktəbdə oğlanların sayı azdır: "Elə regionlar var ki, orada məktəblərin yuxarı siniflərində oğlanlar yoxdur".