Bakı. 28 sentyabr. REPORT.AZ/ "Bu il IX sinif buraxılış imtahanlarının yazı işləri fərqli formada yoxlanılıb".
"Report" xəbər verir ki, bunu Dövlət İmtahan Mərkəzində (DİM) Avropa İttifaqının TAİEX aləti çərçivəsində mərkəz tərəfindən keçirilən imtahanlarda tətbiq edilən "e-markinq" sistemi ilə bağlı tədbirdə Mərkəzin Direktorlar Şurasının sədri Məleykə Abbaszadə deyib.
M.Abbaszadə imtahan nəticələrini yoxlayan ekspertlərin yazı işlərinə pedaqoji və psixoloji xüsusiyyətinə görə fərqli, subyektiv yanaşdıqlarına dair məlumatlara da münasibət bildirib: "Bunun qarşısını almaq üçün bu il IX siniflərin buraxılış imtahanlarının nəticələrinin yoxlanılması zamanı yeni sistemdən - "e-markinq"dən istifadə olunub. Belə ki, yazılı testləri bir müəllim deyil, bir yazını ayrı-ayrı məkanlarda fərqli müəllimlər yoxlayır və nəticələr uyğunlaşdırılır. Qiymətləndirmələr arasında çox fərq olduqda, yazı işi üçünçü müəllim tərəfindən yoxlanılır".
Sədr qeyd edib ki, bu il IX siniflərin buraxılış imtahanlarına aid 200 min yazı işi yoxlanılıb: "Onların 90 mini Azərbaycan dili, 12-13 mini Rus dili, qalan 100 mindən çoxu isə riyaziyyat fənninə aid yazı işləridir".