BDU “Yubiley loqosu” müsabiqəsi elan edib

Bakı. 28 fevral. REPORT.AZ/ Bakı Dövlət Universiteti (BDU) “Yubiley loqosu” müsabiqəsi elan edib.

Universitetin mətbuat xidmətindən "Report"a verilən məlumata görə, 2019-cu ildə Şərqin ilk dünyəvi ali məktəbi olan BDU-nun təsis edilməsinin 100 illik yubileyi tamam olması münasibətlə ali məktəbin “Yubiley loqosu”nun tərtibatı üzrə müsabiqə elan edilib.

Loqo müasir və beynəlxalq standartlara cavab verməli, dizaynda 100 illik fəaliyyət əks edilməlidir. Müsabiqəyə indiyə qədər istifadə edilməyən və digər loqoların elementlərini təkrarlamayan orijinal nümunələr təqdim olunmalıdır. 

Loqonun eskizi [email protected] elektron ünvanına “Yubiley loqosu” yazılmaqla göndərilməlidir.

Qaliblər, həmçinin müsabiqədə fərqlənən digər müəlliflər də mükafatlandırılacaq, universitetin 100 illik yubiley tədbirlərinə dəvət ediləcək və ən yaxşı loqolar yubiley ərəfəsində təşkil ediləcək tədbirlərdə nümayiş etdiriləcək.