Yuxarı
    Bağlamaq

    BANM-in 700 bal toplayan tələbəsi: “Seçimimi özüm etmişəm”

    Bakı. 6 sentyabr. REPORT.AZ/ Bu il qəbul imtahanında 700 bal toplayan Kənan Məhəmmədlinin Bakı Ali Neft Məktəbinin (BANM) İctimaiyyətlə əlaqələr şöbəsinə müsahibə verib.

    "Report" həmin müsahibəni təqdim edir: 

    - Kənan, özünüz barədə bir az danışın.

    - Mən Məhəmmədli Kənan, Goranboy rayonu Səfikürd kəndində anadan olmuşam. Birinci sinifə elə Səfikürd tam orta məktəbində getmişəm, 2018-ci ildə isə bu məktəbdən məzun olmuşam. 5-ci sinifdə şahmat oyunu üzrə rayon birincisi, 9-cu sinifdə isə məntiq yarışması üzrə məktəb birincisi olmuşam.

    - Qəbul imtahanında göstərdiyiniz uğura görə kimə təşəkkür edərdiz?

    - Valideynlərimə və mənə əziyyət çəkən bütün müəllimlərimə təşəkkür edirəm.

    - Niyə I qrupa üstünlük vermisiz?

    - Texniki fənləri həmişə çox sevmişəm, bu səbəbdən də I qrupa hazırlaşmağı qərara aldım.

    - Ali məktəblər arasında BANM-a üstünlük verməyinizin səbəbi nədir?

    - BANM-ı seçmək üçün səbəb çoxdur. Bilirdim ki burada təhsilin səviyyəsi yüksəkdir. Həm də burada “Foundation” ili var ki, sənə mükəmməl ingilis dili və kompüter texnologiyaları öyrədirlər. Bu Ali Məktəb insan üçün böyük imkanlar açır.

    - Boş vaxtlarınızə necə dəyərləndirirsiz?

    - Boş vaxtlarımda ən çox musiqi dinləyirəm. Bundan başqa bədii əsərlər oxuyuram, seçim zamanı üstünlüyü isə detektiv əsərlərə verirəm.

    - BANM-da hansı ixtisası seçdiz və həmin ixtisas nə ilə sizi özünə cəlb etdi?

    - Mən “Proseslərin avtomatlaşdırılması mühəndisliyi”ni seçdim. Əvvəldən həmin ixtisasa qəbul olmaq üçün çalışırdım.

    - Niyə məhz “Proseslərin avtomatlaşdırılması mühəndisliyi”ni istəmisiz?

    - Çünki, BANM-ı və bu ixtisası bitirdikdən sonra şirkətlərin standartlarına cavab verən və bacarıqlı mühəndis olacağıma inanıram.

    - Seçiminizi özünüz etmisiz, yoxsa məsləhətdi olub?

    - Mənə heç kim təsir etməyib və məsləhət verməyib. Seçimimi özüm etmişəm.

    - BANM-ı bitirdikdən sonra planlarınız nədir?

    - BANM-dan sonra təhsilimi davam etdirmək və xaricdə magistratura oxumağı planlayıram.

    - Gələcəkdə özünüzü hansı vəzifədə və hansı şirkətdə görmək istəyirsiz?

    - Bu suala cavabda çətinlik çəkirəm. Düzü, hələ fikirləşib dəqiqləşdirməmişəm.

    - Sizcə bir insanın uğur əldə etməsi üçün ona nə lazımdır?

    - Mənim üçün hər şey aydındır: əvvəlcə nəyisə arzulayırsan, sonra ona nail olmaq üçün qarşına məqsəd qoyursan, sonda isə həmin məqsəd üçün gecə-gündüz çalışırsan.

    - Nailiyyətlər insanın özünə, yoxsa şansa daha çox bağlıdır?

    - Çox şey insanın özündən asılıdır. Çünki nailiyyətləri əldə etmək üçün çox çalışmaq lazımdır. Lakin təbii ki, şans amilini də vurğulamaq lazımdır. Məsələn, mənim kimi eyni potensiala malik abituriyentlər şansları gətirmədiyi üçün 692, 695 bal topladılar, hansı ki, onlar da 700 bala layiqdirlər.

    - Dostluq nə deməkdir və dostlarınızı necə seçirsiz?

    - Dost insan həyatında çox önəmli şəxsdir. Əsl dost 2-ci qardaşdır. Mən dostlarımı zamanla, onları daha yaxından tanıyaraq seçirəm.

    - Sizdən sonra gələcək abituriyentlərə tövsiyyələriniz nədir?

    - Gələcək abituriyentlərə yalnız bir məsləhətim var: öz üzərlərində dayanmadan çox çalışsınlar. Necə deyərlər, cəfa çəkməsən səfa görməzsən. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi