Yuxarı

BANM-də "Schlumberger" şirkətinin təqdimatı keçirilib

Düşərgədə müxtəlif ali təhsil ocaqlarında təhsil alan 16 tələbənin iştirakı nəzərdə tutulur

Bakı. 26 may. REPORT.AZ/ Bakı Ali Neft Məktəbində (BANM) tələbələr üçün “Schlumberger” şirkəti tərəfindən 17-22 iyulda Bakıda təşkil olunacaq yay düşərgəsi ilə bağlı təqdimat keçirilib.

Ali Məktəbin İctimaiyyətlə Əlaqələr şöbəsindən "Report"a verilən məlumata görə, tədbirdə BANM-in “Neft-qaz mühəndisliyi”, “Proseslərin avtomatlaşdırılması mühəndisliyi”, “Kimya mühəndisliyi” ixtisasları üzrə təhsil alan 2,3 və 4-cü kurs tələbələri iştirak edib. Onlara “Schlumberger” şirkətinin təşkil etdiyi yay düşərgəsi haqqında ətraflı məlumatı şirkətin Xəzər regionunda kadrlar və universitetlərlə əlaqələr üzrə meneceri Asset İskakov verib.

Təqdimatda “Schlumberger” şirkəti tərəfindən hər il bir həftəlik intensiv proqram əsasında təşkil olunan yay düşərgəsi, seçim mərhələləri, qəbul şərtləri, həmçinin şirkətin fəaliyyəti, Xəzər regionunda neft və qaz sənayesi üzrə təklif etdiyi xidmətləri və digər fəaliyyət istiqamətləri barədə məlumat verilib.

Sonra şirkətin nümayəndəsi tələbələri maraqlandıran sualları cavablandırıb.

Sonda yay düşərgəsində iştirak etmək istəyən tələbələr arasında seçim mərhələsinin ilk turu keçirilib. Seçimin növbəti mərhələsindən uğurla keçən tələbələr yay düşərgəsində iştirak etmək imkanı qazanacaqlar.

Qeyd edək ki, yay düşərgəsi “Schlumberger” şirkətində gələcəkdə neft və qaz sənayesi üzrə karyeralarını qurmaq istəyən tələbələr üçün nəzərdə tutulur. Yay düşərgəsi zamanı öz fəaliyyəti ilə fərqlənən tələbələrə işlə bağlı təkliflər olacağı gözlənilir. Ümumilikdə düşərgədə müxtəlif ali təhsil ocaqlarında təhsil alan 16 tələbənin iştirakı nəzərdə tutulur.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi