Yuxarı

Azərbaycanda universitetlərə akademik muxtariyyət veriləcək

Azərbaycanda universitetlərdən birində dekanlar üçün təlim keçirilir

Bakı. 9 iyul. REPORT.AZ/ Bu gün Azərbaycan Dövlət İqtisad Universitetində (ADİU) ali təhsil müəssisələrinin dekanları üçün "Tədrisin təşkili" adlı təlim proqramına başlanılıb. "Report" xəbər verir ki, təlimin məqsədi universitet tədrisinin dekanlıq səviyyəsində modelini qurmaq, təhsilin keyfiyyətinin artırılmasına xidmət edən kadr potensialının gücləndirilməsi və qarşıya qoyulan vəzifələrin uğurla həyata keçirilməsi üçün zəmin yaratmaqdır.

ADİU-nun rektoru Ədalət Muradov bildirib ki, universitetin idarəetmə fəlsəfəsinin əsasında dekanların liderliyi dayanır: "Təlim proqramı dekanların peşəkarlığının, səriştəlilik səviyyəsinin yüksəldilməsinə, sağlam rəqabətin formalaşmasına müsbət təsir edəcək. Dekanların iş prosesində qarşılaşdıqları problemləri birgə müzakirə etmək imkanı yaranacaq. Problem yaradan məqamları aradan qaldırmaq üçün təkliflər hazırlanıb, Təhsil Nazirliyinə göndəriləcək".

Təhsil Nazirliyinin aparat rəhbərinin müavini Yaqub Piriyev təhsil naziri Mikayıl Cabbarovun təlimləri müsbət dəyərləndirdiyini bildirib: " "Azərbaycanda Təhsilin İnkişafı üzrə Dövlət Strategiyası" və onun bazasında hazırlanan "Fəaliyyət Planı"na uyğun olaraq, təhsil sahəsində islahatlar aparılır. Artıq bütün ali təhsil müəssisələrinə maliyyə muxtariyyəti verilib. İndi isə akademik muxtariyyətin verilməsi istiqamətində işlər görülür. Universitetlər bu imkanlardan yararlana bilmək üçün hazırlıqlı olmalıdırlar. Bu baxımdan, ali təhsil müəssisələrinin dekanları üçün təlimin əhəmiyyəti böyükdür".

Aparat rəhbəri gələcəkdə belə təlimlərin digər ali təhsil müəssisələrinin dekanlarının da cəlb ediləsinin müsbət nəticə verəcəyini bildirib.

Təlimdə Bolonya prosesi və Avropa təhsil sisteminin formalaşması, qanunvericilik, ali təhsil müəssisələrində kredit sistemi ilə tədrisin təşkilinə dair normativ-hüquqi sənədlər haqda fikir mübadiləsi aparılacaq. Eyni zamanda, fakültələrdə tədris işinin təşkili və təkmilləşdirilməsi, tədris prosesi, tədris-metodiki təminat, ali təhsil müəssisələrinin bakalavriat və magistratura səviyyələrində təhsil alanların köçürülməsi, xaric edilməsi, bərpa olunması və akademik məzuniyyət götürülməsi və universitetdə nizam-intizam qaydaları barədə müzakirələr keçiriləcək.

Təlimdə ADİU-nun dekanları və mərkəz rəhbərləri iştirak edir. Təlimlər beş gün davam edəcək və sonda iştirakçılara sertifikatlar veriləcək.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi