Yuxarı
    Bağlamaq

    AMEA-nın Coğrafiya və Zoologiya institutları pilotsuz uçan aparatla təmin edilib

    © Science.gov.az

    Bakı. 30 mart. REPORT.AZ/ AMEA-nın Coğrafiya və Zoologiya institutları pilotsuz uçan aparatla təmin edilib.

    AMEA-nın Mətbuat xidmətindən "Report"a verilən məlumata görə, Akademiyanın Yüksək Texnologiyalar Parkında (YT Park)  AMEA-nın Coğrafiya və Zoologiya institutlarına elmi tədqiqat işlərində müxtəlif müşahidə və təcrübələrin aparılması üçün dron təhvil verilib.

    Tədbirdə YT Parkın direktoru, aqrar elmlər üzrə fəlsəfə doktoru Vüqar Babayev çıxış edərək son 3 il ərzində rəhbərlik etdiyi qurumda mülki və hərbi təyinatlı dronların hazırlanması istiqamətində işlərin görüldüyünü bildirib. O qeyd edib ki, 2017-ci ilin oktyabrından etibarən isə YT Parkın rezidenti olan “Elm və Texnologiya Parkı” MMC tərəfindən kütləvi seriya olan bir sıra dron modelləri hazırlanıb. O, dronların AMEA-nın elmi müəssisə və təşkilatlarının çöl şəraitində aparılan tədqiqatlarının keyfiyyətinin yüksəldilməsinə, bu sahədə işin səmərəliliyinin artırılmasına, kənd təsərrüfatında ərazinin spektral analizinin aparılmasına, müəyyən sahələrdə radiasiya və radiomaqnit şüalarının səviyyəsinin ölçülməsinə böyük töhfə verəcəyini söyləyib.

    V.Babayev bundan öncə Neft və Qaz İnstitutuna pilotsuz uçan aparatın verildiyini, AMEA-nın digər elmi müəssisə və təşkilatlarının da dronlarla təmin ediləcəyini diqqətə çatdırıb.

    Sonra Zoologiya İnstitutunun direktoru, fizika-riyaziyyat elmləri üzrə fəlsəfə doktoru, dosent Elman Yusifov çıxış edərək dronlardan nəsli kəsilməkdə olan heyvanlarla bağlı dəqiq məlumatların əldə olunmasında, o cümlədən respublika ərazisində digər heyvanların sayının, cinsinin və yaş tərkiblərinin müəyyənləşdirilməsində istifadə olunacağını diqqətə çatdırıb.

    Tədbirdə çıxış edən Coğrafiya İnstitutunun İqlim və aqroiqlimşünaslıq şöbəsinin böyük elmi işçisi, coğrafiya üzrə fəlsəfə doktoru Mətləb Rəhimov dronlardan landşaftşünaslıq, iqlimşünaslıq, geomorfologiya, okeonologiya və meşə tədqiqatlarında istifadə ediləcəyini deyib.

    Sonda müəssisələr arasında təhvil-təslim müqaviləsi imzalanıb. Müqaviləni YT Parkın direktoru V.Babayev və Zoologiya İnstitutunun direktoru Elman Yusifov və Coğrafiya İnstitutunun nümayəndəsi İlyas Alıyev imzalayıblar.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi