Gürcüstanda Rəsulzadənin nəslindən olan alim vəfat edib

Gürcüstanda Rəsulzadənin nəslindən olan alim vəfat edib Gülnarə Rəsulzadə Tbilisidə yaşamasına baxmayaraq daim Azərbaycan naminə çalışıb
Elm və təhsil
23 Yanvar , 2016 21:57
Gürcüstanda Rəsulzadənin nəslindən olan alim vəfat edib

Bakı. 23 yanvar. REPORT.AZ/ Azərbaycan Xalq Cümhuriyyətinin banilərindən biri, Azərbaycan Milli Şurasının sədri Məhəmməd Əmin Rəsulzadənin nəslindən olan alim, tibb elmləri doktoru Gülnarə Rəsulzadə yanvarın 23-də Tbilisidə dünyasını dəyişib.

“Report” “Azərtac”a istinadən xəbər verir ki, mərhumənin dəfn mərasimində Azərbaycanın Xarici İşlər Nazirliyinin, Gürcüstandakı səfirliyinin, Gürcüstan Azərbaycanlıları Milli Konqresinin rəhbərliyi və əməkdaşları iştirak ediblər. 
Səfirlik adından mərhumənin məzarı önünə əklil qoyulub.

Mərasimdə bildirilib ki, Gülnarə Rəsulzadə atası Mirzə David Rəsulzadənin yolunu uğurla davam etdirib. AXC dövründə Azərbaycanda məsul vəzifə tutan M.D.Rəsulzadə Tbilisidə “Gürcüstan” qəzetinin təsisçisi və redaktoru olub. O, 1937-ci ildə repressiyaya məruz qalıb. Gülnarə Rəsulzadə Tbilisidə yaşamasına baxmayaraq daim Azərbaycan naminə çalışıb. O, Gürcüstanda Azərbaycan mədəniyyətinin, elminin, tarixinin təbliği istiqamətində xeyli işlər görüb.