Çinin Lonqdonq Universiteti ADNSU ilə birgə layihələr həyata keçirəcək

Bakı. 24 dekabr. REPORT.AZ/ Çin Xalq Respublikasında səfərdə olan Azərbaycan Dövlət Neft və Sənaye Universitetinin (ADNSU) rektoru, professor Mustafa Babanlı Qansu əyalətinin Lonqdonq Universitetinin prorektoru Ma Yueninqin rəhbərlik etdiyi nümayəndə heyəti ilə görüşüb.

ADNSU-dan "Report"a verilən məlumata görə, prorektor Ma Yueninq Lançjouya Lonqdonq Universitetinin rektorunun tapşırığı ilə əməkdaşlıq münasibətlərini müzakirə etmək məqsədilə gəldiklərini qeyd edərək təmsil etdiyi ali məktəbin neft-qaz təhsili sahəsində Çində aparıcı universitetlərdən biri olduğunu bildirib.

Rektor M.Babanlı Lonqdonq Universitetinin ADNSU ilə əməkdaşlığa böyük önəm verməsinə görə təşəkkürünü ifadə edərək ali məktəbin imkanları və nailiyyətləri barədə ətraflı məlumat verib və universitetin əməkdaşlığa hazır olduğunu bildirib.

Lonqdonq Universitetinin prorektoru ADNSU-nun yüksək potensialından istifadə etmək arzularını ifadə edərək ixtisasartırma və elmi kadrların hazırlanmasında, azərbaycanlı müəllimlərin tədrisə cəlb olunmasında, birgə layihələrin gerçəkləşdirilməsində maraqlı olduqlarının diqqətə çatdırıblar.

Tərəflər Lonqdonq Universitetinin nümayəndələrinin ADNSU-da təhsil imkanları ilə yerində tanış olmaları üçün Azərbaycan paytaxtına səfərə gəlmələrinə dair razılıq əldə ediblər.