BANM-in üç tələbəsi Malayziyada təhsil alacaq

BANM-in üç tələbəsi Malayziyada təhsil alacaq
Elm və təhsil
60
31 Yanvar , 2018 10:19
BANM-in üç tələbəsi Malayziyada təhsil alacaq
BANM

Bakı. 31 yanvar. REPORT.AZ/ Malayziyanın “Petronas” şirkətinin Azərbaycan nümayəndəliyinin insan resursları şöbəsinin rəhbəri Şeyda Mehdiyeva və korporativ əlaqələr şöbəsinin əməkdaşı Aysel Allahverdiyeva Bakı Ali Neft Məktəbinin (BANM) tələbələri ilə görüşüb.

Bu barədə "Report"a BANM-dən məlumat verilib.

Məlumata görə, görüşdə Ali Məktəbin birinci və ikinci kurs tələbələri iştirak ediblər.

BANM rektoru Elmar Qasımov neft-qaz sektorunda dünyanın aparıcı şirkətlərindən hesab edilən “Petronas” şirkətinin BANM ilə genişlənməkdə olan əməkdaşlığından danışıb. O, görüşün təşkil olunmasının əsas məqsədini izah edərək şirkətin Azərbaycan nümayəndəliyinin insan resurları şöbəsinin rəhbəri Şeyda Mehdiyevanı tələbələrə təqdim edib.

Daha sonra “Petronas” şirkətinin Azərbaycan nümayəndəliyinin insan resursları şöbəsinin rəhbəri Şeyda Mehdiyeva şirkət və onun təqaüd proqramı haqqında tələbələrin qarşısında geniş təqdimatla çıxış edib. O bildirib ki, “Petronas” şirkəti BANM-ın 3 tələbəsini Malayziyanın Petronas Texniki Universitetində təhsil ala bilməsi üçün sponsorluq edəcək. Tələbələr kimya mühəndisliyi, neft-qaz mühəndisliyi və neft-qaz geologiyası ixtisasları üzrə “Petronas” şirkətinin hesabına təhsil almaq şansı əldə edəcəklər. Ş.Mehdiyeva təqaüd proqramında iştirak etmək üçün əsas kriteriyalar, müraciət qaydası, seçim prosesi, həmçinin öz təhsilini uğurla başa vuranlar üçün “Petronas” şirkətində uğurlu karyera qura bilmək imkanından danışıb.

E.Qasımov BANM və onun tələbələrinə göstərilən maraq və verilən qiymətə görə Ş.Mehdiyevanın timsalında “Petronas” şirkətinin rəhbərliyinə öz təşəkkürünü bildirib. Rektor qeyd edib ki, BANM tələbələrinin Petronas şirkətinin dəstəyilə Malayziyada təhsil almasını dəstəkləyir, çünki Ali Məktəbin tələbələri – Azərbaycanın ən bacarıqlı gəncləri olaraq neft-qaz sektorunda ölkəmizi qabaqcıl transmilli şirkətlərdə təmsil etməlidirlər.

Tələbələrin böyük marağına səbəb olan təqdimatın sonunda şirkətin nümayəndələri tələbələri maraqlandıran suallara cavab veriblər.

Qeyd edək ki, təqaüd proqramına müraciət edən namizədlər ilkin mərhələdə şirkətin Azərbaycan nümayəndəliyi tərəfindən, sonuncu mərhələdə isə Malayziyadakı baş ofisi tərəfindən əvvəlcədən müəyyən edilən xüsusi kriteriyalar əsasında seçiləcəklər. Ali Məktəbin tələbələri təhsillərini şirkətin həyata keçirdiyi “Petronas Təhsil Sponsorluq Proqramı” çərçivəsində alacaqlar.