Bakı. 20 yanvar. REPORT.AZ/ Bu gün səhər saat 9 radələrində Lerik Meşə-mühafizə və Bərpası Müəssisəsinin Gürdəsər Meşəbəyliyinin 7 saylı meşə dolayının 62 kvartalında yanğın hadisəsi baş verib. Bu barədə "Report"a Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova bildirib.
Onun sözlərinə görə, yanğın nazirlik əməkdaşlarının və yerli sakinlərin səyləri nəticəsində qısa müddət ərzində söndürülüb.
Nazirlik rəsmisi qeyd edib ki, yanğın 60 sot ərazini əhatə edib: "Quru ot və kol örtüyü yanıb. Ona görə də meşə fonduna ciddi ziyan dəyməyib. İlkin ehtimala görə, yanğın Babagil piri adlanan əraziyə gələn ziyarətçilərin səhlənkarlığı və ehtiyatsızlığı nəticəsində baş verib".