ETSN-də könüllülər arasında bilik yarışması keçirilib - YENİLƏNİB

Ekologiya və Təbii Sərvətlər Nazirliyində (ETSN) müxtəlif dövlət qurumlarının könüllülərindən ibarət komandaların iştirakı ilə keçirilən bilik yarışması yekunlaşıb.

"Report" xəbər verir ki, 13 komandanın iştirak etdiyi yarış “Xəmsə” formatında üç mərhələdən ibarət olub və yüksək nəticə göstərən 4 komanda finala vəsiqə qazanıb.

Digər 4 komanda isə həvəsləndirici mükafat uğrunda mübarizə aparıb.

Yüksək bilik səviyyəsi, geniş dünyagörüşü və hazırcavablıqları ilə seçilən Gənclər və İdman Nazirliyinin “Gənclər” komandası birinci, Xarici İşlər Nazirliyinin “Diplomatiya könüllüləri” komandası ikinci, Əmək və Əhalinin Sosial Müdafiəsi Nazirliyinin “Könüllü DOST” komandası üçüncü, Dövlət Turizm Agentliyinin “Turizm könüllüləri” komandası dördüncü yeri tutub, həvəsləndirici mükafata isə Dövlət Gömrük Komitəsinin “Gömrükçü könüllülər”i komandası layiq görülüb.

Qalib komandalar ETSN tərəfindən mükafatlandırılıb.

***12:01 

Bu gün Ekologiya və Təbii Sərvətlər Nazirliyində (ETSN) müxtəlif qurumlarda fəaliyyət göstərən könüllülərin iştirakı ilə bilik yarışı keçirilir.

"Report" xəbər verir ki, müxtəlif nazirlik və komitələrin könüllülərini bir araya toplayan yarışın keçirilməsində məqsəd könüllülər arasında sağlam rəqabət mühitinin formalaşdırılmasına, koordinasiya işinin təkmilləşdirilməsinə və əlaqələrin möhkəmlənməsinə dəstək verməkdir.

“Xəmsə” formatında təşkil olunan bilik yarışmasında 13 dövlət qurumunun könüllü komandası iştirak edir. Yüksək nəticə göstərən 4 komanda finala vəsiqə qazanacaq.

Xatırladaq ki, Azərbaycan Respublikasının Prezidenti İlham Əliyevin sərəncamı ilə gənclərin fərdi inkişafına təkan vermək, onlarda sosial məsuliyyət hissini artırmaq, gəncliyin potensialından xalqın rifahı və ölkəmizin dayanıqlı inkişafı üçün səmərəli istifadə etmək məqsədilə 2020-ci il Azərbaycan Respublikasında “Könüllülər ili” elan edilib.