Bakı. 22 iyun. REPORT.AZ/ Ekologiya və Təbii Sərvətlər Nazirliyi ağacların kəsilməsi ilə bağlı vətəndaşlara müraciət edib.
"Report"un məlumatına görə, nazirliyin mətbuat katibi İradə İbrahimova mətbuat konfransında bildirib ki, hər bir vətəndaş ağac kəsilməsi ilə bağlı məlumatı olan kimi, onun qarşısının alınması üçün operativlik göstərərək dərhal nazirliyə məlumat versə təbiəti məhv edənlərə qarşı mübarizədə daha çox kömək edər: "Nazirliyin 168 nömrəli "Qaynar xətt"i 24 saat ərzində fəaliyyət göstərir. Vətəndaşlarımızdan xahiş edirik ki, hasara alınmış sahələrdə, tikinti yerlərində və digər ərazilərdə kəsilmək təhlükəsi olan ağacları qorumaq üçün nazirliyin "Qaynar xətt"inə məlumat versinlər. İnanırıq ki, bu cür qarşılıqlı əməkdaşlıq şəraitində yüzlərlə ağacı kəsilmədən xilas edə bilərik".
O deyib ki, son vaxtlar ayrı-ayrı vətəndaşlar və KİV nümayəndələri tərəfindən yaşıllıqların mühafizəsinə diqqət artıb, bu da sevindiricidir: "Vətəndaşlar tərəfindən olunan operativ müraciətlər nəticəsində bir sıra ərazilərdə ağacların kəsilməsinin qarşısı alınıb. Nazirlik belə müraciətləri müsbət dəyərləndirir və bu işdə bütün ictimaiyyəti fəal, yaşıllığa qarşı qayğıkeş və həmrəy olmağa çağırır".