Yuxarı

​Bakıda 100-dək “IDEA velosiped dayanacağı” quraşdırılacaq

Növbəti dayanacaqların Heydər Əliyev Mərkəzi və Dövlət Bayrağı Meydanı ərazisində quraşdırılması nəzərdə tutulub

Bakı. 9 iyun. REPORT.AZ/ IDEA (Ətraf Mühitin Mühafizəsi naminə Beynəlxalq Dialoq) İctimai Birliyi (İB) Bakı şəhərində velosipeddən istifadəni təşviq etmək məqsədilə “IDEA velosiped dayanacağı” (IDEA Bycile Stand) layihəsini davam etdirir. Bu barədə “Report”a İB-dən məlumat verilib.

Qeyd edək ki, Azərbaycan Velosiped İdmanı Federasiyası və “GreenCar” elektrik nəqliyyat vasitələrinin satış mərkəzi ilə birlikdə həyata keçirilən bu layihə üzrə ilk belə dayanacaq mayın 26-da “Port Baku” kompleksində yerləşən “The Club” idman mərkəzinin qarşısında quraşdırılıb.

Növbəti bu cür dayanacaqların Heydər Əliyev Mərkəzi və Dövlət Bayrağı Meydanı ərazisində quraşdırılması nəzərdə tutulub.

Gələcəkdə paytaxda 100-dək “IDEA velosiped dayanacağı”nın quraşdırılması nəzərdə tutulub.

Dayanacaqların quraşdırılması şəhərdə ekoloji təmiz nəqliyyat növü hesab edilən velosipedi təşviq etmək məqsədi daşıyır. Belə ki, Bakı şəhərində xüsusi velosiped dayanacaqlarının quraşdırılması əhali arasında bu nəqliyyat növünün seçilməsi üçün əlavə stimul yaradacaq. Velosiped istifadəçiləri müxtəlif ünvanlarda quraşdırılan maraqlı dizaynlı bu dayanacaqlarda öz velosipedlərini rahat park etmək imkanı əldə edəcəklər.

IDEA İctimai Birliyi, Azərbaycan Velosiped İdmanı Federasiyası və “GreenCar” maraqlı tərəfləri ətraf mühitin mühafizəsi naminə “yaşıl nəqliyyat” kampaniyasında iştirak etməyə dəvət edir.

Qeyd edək ki, IDEA velosiped dayanacaqlarını (012) 497-6316 nömrəli telefon vasitəsilə IDEA İctimai Birliyi ilə əlaqə saxlayaraq sifariş etmək mümkündür.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi