Azərbaycan Beynəlxalq Ekoloji Fəaliyyətin Nəticələrinin İndeksi reytinqində MDB-də 1-ci yerdədir

Bakı. 29 yanvar. REPORT.AZ/ ABŞ-ın Yel və Kolumbiya Universitetləri tərəfindən 2016-cı ilin yanvar ayında Beynəlxalq Ekoloji Fəaliyyətin Nəticələrinin İndeksi (Environmental Performance İndex) hazırlanıb. Sənəddə 180 ölkə arasında 2 sahə (insan sağlamlığının qorunması və ekosistemlərin mühafizəsi) və 9 istiqamət üzrə qiymətləndirmə aparılıb.

Ekologiya və Təbii Sərvətlər Nazirliyindən "Report"a verilən məlumata görə, Yel və Kolumbiya Universitetləri qiymətləndirmə nəticələrinə əsasən mövcud ekoloji vəziyyətə görə Azərbaycanı dünya ölkələri arasında 100 ballıq qiymətləndirmə sistemi üzrə 83.78 balla 31-ci yerə qoyub. Bununla da reytinq sıralanmasına görə Azərbaycan Yaponiya, Belçika, Hollandiya, İsrail kimi dünyanın bir sıra qabaqcıl və inkişaf etmiş ölkələrindən ön mövqe tutub.

Qiymətləndirmədə qonşu Gürcüstanla Azərbaycan arasında 20 bal fərq olduğu halda, Azərbaycanla 1-ci yerdə olan Finlandiya arasında cəmi 7 bal fərq var.

Eyni zamanda, regional səviyyədə aparılan qiymətləndirmənin nəticələrinə əsasən Yel və Kolumbiya Universitetləri Azərbaycanı Şərqi Avropa və Mərkəzi Asiya regionu üzrə 2-ci yerə çıxarıb. Bu sıralamada Azərbaycan Türkiyə, Rusiya, Ukrayna, Qazaxıstan, Belarus kimi ölkələrdən qabaqdadır, MDB ölkələri arasında isə 1-cidir.

Sənədə əsasən, Azərbaycan İqlim və Enerji istiqamətinə görə sıralamada 100 ballıq sistem üzrə 97.94 balla qiymətləndirilərək bütün ölkələr arasında 2-ci, həmin bölmənin Karbon İntensivliyi göstəricisi üzrə isə 100 balla 1-ci yerdə qərarlaşıb.

Qeyd edək ki, Azərbaycan BMT-nin İqlim Dəyişmələri üzrə Çərçivə Konvensiyasının istilik effekti yaradan qazların tullantılarının azaldılması üzrə kəmiyyət öhdəliyi götürməyən tərəf olsa da, son illər ölkədə iqtisadiyyatın üç dəfədən çox böyüməsinə baxmayaraq tullantıların azaldılması istiqamətində həyata keçirilən konkret tədbirlər hesabına həmin tullantıların 1990-cı ilin baza səviyyəsindəki 73 milyon tondan 51 milyon tona qədər endirilməsinə nail olub.

Belə ki, 1990-2000-ci illərdə Azərbaycanda istilik effekti yaradan qaz tullantılarının azaldılması əsasən sovet iqtisadiyyatının dağılması səbəbindən iqtisadi tənəzzüllə bağlı idisə, 2000-ci ildən sonrakı dövrdə ölkə üzrə ÜDM-in və sənaye istehsalının dəfələrlə artmasına, minlərlə yeni müəssisələrin yaradılmasına baxmayaraq, tullantıların miqdarı azalmış və karbon intensivliyi göstəricisi aşağı düşüb.

Beynəlxalq Ekoloji Fəaliyyətin Nəticələrinin İndeksində meşələrlə bağlı istiqamətdə qiymətləndirmə üzrə Azərbaycan 180 ölkə arasında 5-ci yeri tutub. Bu yüksək göstəricinin əldə edilməsinin səbəbi yeni meşə əkinləri nəticəsində meşə ilə örtülü ərazilərin sahəsinin artırılaraq 11,8 faizə çatdırılması, sənaye qırıntılarının qadağan olunması, meşələrin mühafizəsi tədbirlərinin gücləndirilməsi, o cümlədən qanunsuz ağac kəsmə hallarının qarşısının alınması, regionların qazlaşdırılması, KİV və QHT-lərlə birgə ictimaiyyət arasında aparılmış təbliğat hesabına qırıntı hallarının ilbəil azalması olub.