Yuxarı

Abşeron Milli Parkında marafon keçirilib - FOTO

Abşeron Milli Parkında marafon keçirilib

Abşeron Milli Parkında Dövlət Bayrağı Günü ilə əlaqədar “Sağlam ətraf mühit, sağlam həyat naminə” ilk qaçış marafonu keçirilib.

"Report" xəbər verir ki, “Sən də qoşul, dostlarını sağlam ətraf mühitdə sağlam yaşamağa dəvət et!” şüarı altında təşkil olunan marafona ilk olaraq Kənd Təsərrüfatı Nazirliyinin tabeliyində “Aqrar Tədarük və Təchizat” Açıq Səhmdar Cəmiyyəti dəstək verib və kollektiv olaraq yürüşə qoşulub.

Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova bildirib ki, qaçış marafonunun keçirilməsində əsas məqsəd təkcə milli parklarda ekoturizmin inkişafına nail olmaq deyil, eyni zamanda, insanları ətraf mühitin sağlamlaşdırılması tədbirlərinə dəstək verməyə çağırmaq, milli parklarda bu cür tədbirlərin keçirilməsi ənənəsini formalaşdırmaq və sağlam həyat tərzini təbliğ etməkdir.

Mətbuat katibi qeyd edib ki, ilk dəfə olaraq Azərbaycanın milli parklarından birində bu cür kütləvi maarifləndirici və ətraf mühitin mühafizəsinə diqqət çəkən qaçış marafonu keçirilib: "Bu, ekoloji turizmin təbliği, sağlam həyat tərzinin təşviqinə yönələn tədbir olmaqla yanaşı, insanların həftəsonu günlərini təbiət ərazilərində səmərəli keçirmələri üçün bir nümunədir. Ətraf mühitin sağlamlaşdırılmasına, sağlam həyat tərzinin aşılanmasına hədəflənən bu cür tədbirlər davamlı olaraq digər milli parklarımızda da təşkil olunacaq. Marafona qoşulan 70-ə yaxın iştirakçı 6 kilometr məsafə qət edib və finiş xəttini keçən ilk üç marafonçu hədiyyələrlə mükafatlandırılıb. Həmçinin marafonun bütün iştirakçılarına mayın 1-dək yaxınları ilə birgə Abşeron Milli Parkına birdəfəlik ödənişsiz giriş imkanı verən dəvətnamə təqdim olunub".

"Aqrar Tədarük və Təchizat" Açıq Səhmdar Cəmiyyətinin İdarə Heyətinin sədri Leyla Məmmədova bildirib ki, bayram günü olmasına baxmayaraq, hər iki qurumun əməkdaşları marafonda aktiv iştirak ediblər. Bu gün sağlam həyat tərzini təbliğ etdik, ətraf mühitin mühafizəsinə diqqət çəkdik və milli parklarımızdan birini göstərmiş olduq. Düşünürəm ki, bu tədbiri keçirtməklə digər vətəndaşlar üçün yaxşı nümunə ola bildik”.

Yarışın qalibləri "Aqrar Tədarük və Təchizat" Açıq Səhmdar Cəmiyyətinin əməkdaşları Şahmar Rzayev və Günəş Bünyadzadə qaçış marafonun təşkilini təqdirəlayiq hal kimi qiymətləndiriblər. Onlar bu gün milli parkda sağlam həyat tərzi keçirdiklərini və buradan xoş təəssüratlarla ayrıldıqlarını bildiriblər. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Tərəfdaşların xəbərləri


Xəbər lenti

Son xəbərlər



Orphus sistemi