Yuxarı

Xalq yazıçısı Çingiz Abdullayevə “Şərəf” ordeni təqdim olunub

Xalq yazıçısı Çingiz Abdullayevə “Şərəf” ordeni təqdim olunub
© Report/ Firi Salim

Azərbaycanın xalq yazıçısı Çingiz Abdullayevə “Şərəf” ordeninin təqdim olunması mərasimi keçirilib.

“Report” xəbər verir ki, dünya şöhrətli yazıçıya mükafatı mədəniyyət naziri Əbülfəs Qarayev təqdim edib.

Çingiz Abdullayev Prezident İlham Əliyevə minnətdarlığını bildirib: "Oxucularıma da kitablarımı oxuduqlarına görə təşəkkür edirəm. Bu günə qədər, yəni son üç gündə 6 ölkə məni mükafatlarla təltif edib. Buna baxmayaraq, mənim üçün ən yüksək mükafat Azərbaycan dövlətinin verdiyi ordendir".

Ə.Qarayev qeyd edib ki, Ç.Abdullayev müxtəlif sahələrdə iz qoymuş şəxsiyyətdir: "İdmandan tutmuş mədəniyyətə qədər müxtəlif sahələrdə həyata keçirilən böyük layihələrdə onun adı çəkilir. Çingiz Abdullayev ölkəmizdə gedən proseslərə daim öz mövqeyini bildirən insanlardandır. Baxmayaraq ki, geniş ictimai vəzifələri mövcuddur, ancaq xırda məsələlərə də biganə qalmır. Bu da insanı real olaraq cəmiyyətin üzvü olmağa layiq edir. O eyni zamanda Azərbaycanın güclü təbliğatçısına çevrilib. Dünyanın bir çox kitabxanalarını ziyarət etmişəm, hər yerdə Çingiz Abdullayevin azı 1-2 kitabı var. Bu mükafata görə mən Prezident İlham Əliyevə öz təşəkkürümü bildirmək istərdim. Bir ədibin belə dəyərləndirilməsi Azərbaycan ədəbiyyatına verilən dəyərdir".

Xalq yazıçısı Anar bildirib ki, Çingiz Abdullayev istedadlı olmaqla yanaşı, həm də çox işgüzardır: "Bu qədər romanı yazmaq üçün həqiqətən də çox işgüzar və öz işinə sadiq olmaq lazımdır. Dəfələrlə səfərdə olmuşuq, onun yolda da dayanmadan yazdığının şahidi olmuşam".

Xatırladaq ki, Prezident İlham Əliyev Çingiz Abdullayevin “Şərəf” ordeni ilə təltif edilməsi haqqında sərəncam imzalayıb. Sərəncamla Azərbaycan ədəbiyyatının inkişafı və təbliğində xidmətlərinə görə Çingiz Akif oğlu Abdullayev “Şərəf” ordeni ilə təltif edilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi